August Ni 27, 2020 (Ningani) a Village Council inthlanna neih zawh taka Champhai District chhunga  khaw pathum; VC04023-Khuangthing, VC04046-Vaikhawtlang leh VC04058-Zokhawthar khuate atanga thubuai thehluhte chhuichiang leh ngaihtuah tura  State Election Commission Mizoram in a din Champhai District Election Tribunal chuan vawiin khan thubuai thehluhte Champhaiah a ngaihtuah.

Champhai District Election Tribunal-ah hian Pu James Lalrinchhana, Chairman, Director School Education, Pu Henry C.Lalrawnkima, Member, State Protocol Officer leh Pu Lalnunfela Chawngthu, Member Secretary, Election Officer Champhaite an awm a. Vawiin hian heng khaw pathuma Returning Officers, Presiding Officers, Counting Supervisors leh Counting Assistants, Candidates, Complaint thehluttute leh Candidate Counting Agents theuhte koh niin, chipchiar taka thu zawhfiah an ni.

Thu zawhfiahna hun hi zing dar 10 atanga tan niin, VC04023-Khuangthing neih hmasak ber niin, VC04046-Vaikhawtlang-in dawtin  VC04058-Zokhawthar chuan a dawt ve leh a ni. Zawhfiah duh angte an zawh hnu hian Champhai District Election Tribunal hi thukhawm chhunzawm leh nghalin an thil hmuhchhuahte an zirchiang a. Thubuai thehluttute, Official-te leh inthlan kaihhnawiha tel zawng zawngte thu zawhfiahna  ngun taka an zirchian hnuah inthlan result  thlak phahna tur chhan mumal tak an hmuh loh avangin inthlan result chu a pangngai anga kalpui nise tiin thutlukna siam a ni. An thil hmuh dan kimchang leh thutluknate hi State Election Commission-ah an thlen dawn a ni.