2329/2023-2024

Dated Champhai the 15th October, 2023:  Vawiin khan Election Commission of India tirha Champhai District chhung Constituency pathum vil tura ruat Expenditure Observer Pu Abhishek J Jain, IRS, chuan Champhai DC Conference Hall-ah Expenditure Monitoring a taka thawktu tur team hrang hrang te a ko khawm a, meeting pawimawh tak a neih pui.

Expenditure Observer chuan election felfai, dik leh thianghlim a awm theihna turin inthlana candidate-te senso endik tu officials-te an pawimawh takzet thu sawiin, Expenditure Monitoring hnuaia Team hrang hrangte chu inpawhtlang taka hmalak a tul thu a sawi a. Champhai District chu Myanmar international border thui tak awmna anih avang leh ruihhlo leh thil dang tawlh ruk thin luhka anih avangin expenditure vil chungchangah pawh fimkhur zual a tul thu a sawi a. Mizoram Legislative Assembly inthlan hmachhawn turin Champhai District in inpuahchahna tha tak neiin, expenditure team hrang hrangte training pe fel tawhin a hun takah an che chhuak nghal thei chu lawmawm tiin, hmalakna tha taka kalpui chhunzawm zel turin a chah a ni.

Champhai DC & DEO Pu James Lalrinchhana chuan Mizoram Legislative Assembly inthlan hmachhawn tura Champhai District inpuahchahna tlangpui a report a. District-ah inthlanna ralmuang leh hlawhtling tak neih anih theihnan Enforcement agency hrang hrangten ngawrh taka District hhung vilin, inkalpawhna kawng, inbiakpawhna mobile leh internet signal leh Banking chungchanga hmalak tul te pawh bawhzui nghal a ni a. MLA Election, 2023 atan hian Champhai District chu Sector 12 ah then niin 23-Champhai North ah Sector pali (4), 24-Champhai South ah Sector pathum (3) leh 25-East Tuipui ah Sector panga (5) a awm a. Heng sector-ah te hian Sector Officer leh Sector Police Officer te ruat fel tawh niin an duty chhuak mek tawh a. Election Expenditure Monitoring hnuaia team hrang hrang – Flying Squad, Video Surveillance Team, Static Surveillance team te chu duty chhuak tawh in, uluk takin Model Code of Conduct leh expenditure te an enfiah a. Khua leh tui vote nei thei chin ten Vote an thlak ngei theihnan SVEEP hnuaiah Awareness program-te ngawrh taka kalpui chhoh a ni bawk.

Champhai SP Pu Vineet Kumar leh Additional SP Pu Lalmalsawma Hnamte t chuan inthlan hmachhawn tura Champhai Police inpuahchahna a report a. Tun dinhmunah election vuakveta venhim hna thawk tur CAPF Company pahnih chuan Champhai District lo thleng tawh in, Zokhawthar leh Champhai ah company khat ve ve an duty phawt dawn a, Company khat dang lo thlen belh leh tura beisei an ni a. Champhai Police te chuan August thla tawp atang khan ruihhlo do Special Drive kalpuiin, cheng nuai 44 man hu zu man in, Dan kalha zu sakna hmun te an tih chhiat bakah zu siamna bungrua tam thma tak an man a. He Special Drive ah hian Methamphetamine leh heroin cheng vaibelchhe 12.67 man hu pawh mawn niin, ND&PS hnuaiah mi 35 leh MLP Act hnuaiah mi 23 an man a ni.

Assistant Commissioner of Excise & Narcotics Pu C.Thangchuanga pawhin report a pe a. Inthlan puan anih hnuah Excise te chuan Special Drive neiin, October ni 9 atanga ni 14 inkarah raid tum 15 an nei a, zu litre 283.4 man niin, mi pakhat an man bawk a ni.

Vawiin meeting hi Champhai DC & DEO Pu James Lalrinchhana’n a kaihruai a. Election Expenditure Monitoring Nodal Officer Pu Larinawma, PD DRDO in report a pe a.  Vawiin meeting-ah hian Champhai Additional SP, RO leh ARO-te, DIPRO, Asst Commissioner Excise & Narcotics leh Income Tax Surveillance Team-te he meeting ah hian an tel a ni.

Expenditure Observer ho hian naktuk chawhma dar 10 ah Expenditure Team hrang hrangte nen zau zawka meeting neih ani leh dawn a ni.

Champhai District-a inthlan insenso chungchanga hriat fiah duh leh report duh nei tan Expenditure Observer Pu Abhishek J Jain hi 9233968789 ah engtiklai pawhin mipuiten an biak theih a ni.