Vawiin khan Champhai District Fire Prevention Committee chuan Fire Prevention Week hawnna Inkhawm chu Kahrawt veng YMA Community Hall ah a nei a, Champhai Addl Dc Pu C. Lalzarliana chu khuallian niin a hmanpui.

Khuallian chuan ramngaw leh nungcha te chu mihringte tan an hlut zia sawiin an tel lovin mihringte an awm theiloh thu a sawi a, a humhalh leh enkawl na ah a chhunga chengte mihring an pawimawh thu leh zavai mawhphurna a nih thu a sawi a. Chu mi a tana pawimawh tak chu ram tih kan loh a nih thu a sawi. Kangmei laka inven hi mi tin mawhphurna a nih thu sawiin boruak tichhe thei leh ramngaw tichereu zawnga che lo turin kalkhawm mipuite chu a chah a. Khawvel in Global Warming a buaipui mek lai hian Mizoram pawhin mawphurna kan neih ve thu sawiin, kan ramngaw tikanglo tura tan kan lak hian khawvel boruak chhe zel tur kan lo ti ziaawm ve theih thu a sawi a. Kangmei laka inven hian ram nuam leh boruak tha a siam a ni tiin lo theiloh a lo hal pawh fimkhur taka hal turin  kalkhawm mipuite chu a chah a ni.

Hawnna inkhawm hi Pu Vanlalchuailova, IFS, Divisional Forest Officer, Champhai Forest Division in a kaihruai a, khawtlang ai awh in Pu Lalrinmuana’n thu sawiin, Pu Lalchhuanmawia, Assistant Conservator of Forest, Champhai Forest Division in lawmthu sawina in hun a khar a ni.

Kangmei laka venna inkhawmah hian Champhai District Level Fire Prevention Committee Members, Sawrkar Official hrang hrang, Khawtlang hruaitu te leh School Naupang te an tel a ni.