Naktuk April Ni 11, 2019 a Member of Parliament (Lok Sabha) 2019 inthlanna Mizorama neih turah Champhai District chhunga inpuahchahna te chu zawhfel niin vawiin khan inthlan buaipui tu tur ten an duty-na hmun Polling Station an pan darh hlawm a, a thleng tlai ber 22-Lengteng A/C hnuaia Chiahpui Polling Station-a duty tur ten tlai dar 3:45 khan Chiahpui thlengin an thleng kim thei a. Vote hi naktuk zing dar 7 atanga tlai dar 5 thlenga thlak theih a ni ang.

Champhai District chhunga Assembly Constituency 5 hnuaia Polling Station 137-a duty turten tukin zing dar 5:30 atanga tanin an duty-na hmun an pan a, chawhnu dar 2 ah duty tur chhuak hnuhnung berin District Election Office an chhuah san fel thei a ni.  21-Lengteng A/C leh 25-East Tuipui A/C te an duty-na tur a hlat deuh avangin an chhuak hmasa a, Champhai khawpui leh a chhehvel khaw hnaivai 23-Champhai North leh 24-Champhai South A/C hnuaia Polling Station duty tur ten chawhnu lamah an duty-na hmun an  pan a ni. Inthlan Duty tur Sector Officer-te, Presiding Officer-te,  Polling Officer-te leh Police-ten inthlannna tura hmanraw mamawh leh inthlankhawl EVM Set te an lak fel hnuin an duty na hmun an pan zel a, Champhai khawpui chhung duty tur te veivah nan Bus hman ani a, khawpui pawn duty tur tan Maxi Cab hman a ni.

Tun inthlan atan hian EVM khawl Control Unit (CU) 211, Ballot Unit (BU) 211 leh VVPAT 204 te hman tura ruahman a ni a,  21-Lengteng A/C-ah CU-42, BU-42, VVPAT-40; 22-Tuichang A/C-ah CU-40, BU-40, VVPAT-39; 23-Champhai North A/C-ah CU-46,BU-46, VVPAT-45;  24-Champhai South A/C-ah CU-38, BU-38, VVPAT-45 leh 25-East Tuipui A/C-ah CU-45, BU-45, VVPAT-43 te hman tura peih fel a ni.

Tun MP (Lok Sabha) inthlan turah hian Champhai District-ah General Voter 86426 awmin heng zinga 43685 hi hmeichhia niin 42741 chu Mipa an ni a, Mipa Vote aia Hmeichhe Vote tam zawkna hi 944 a ni. Service Voter 715 awm zinga 713 te hi Mipa niin 4 dangte chu hmeichhia an ni. District chhungah  Polling Station 137 awmin, Polling Station 1 ah voter 631 awm zel ang a ni a. Champhai District chhunga Polling Station awm zawng zawng 137 atanga 41 chu khawpui huamchhunga mi niin, a bak Polling Station 96 te chu khawpui pawn a awm a ni. Vote 100 aia tlem awmna Polling Station 1 chauh a awm laiin Vote 1000 chuang awmna Polling Station 13 a awm a ni. Inbiakpawh harsatna Mobile Shadow Area Polling Station 15 chhinchhiah a ni a, heng hmunahte hian MPRO te puihna hmanga inbiakpawhna ruahman tum a ni a. District Election Office atanga Polling Station hla ber chu Km 191-a hla Mimbung Polling Station niin District chhunga Polling Station 137 zinga 123 te chu Lirthei hmanga darkar 6 chhunga thlen hman a ni. MLA Constituency zingah 23-Champhai North-ah voter 18859 awmin a tam ber a, 25-E. Tuipui-ah voter 15133 awmin vote nei  tlemna ber a ni.  Pianphunga rualbanlo vote nei mi 563 an awm bawk a ni.

Critical Polling Station a awm lo a, District chhunga Assembly Constituency 5 ah te Hmeichhe hlang duty-na tur Dingdi Polling Station ti a vuah 14 a awm dawn a, Polling Station thlan bik 10 ah te vote thlaklai thlithlai tura thlalakna vuah tum a ni bawk. Rualbanlo/Vohbik leh kum 80 chuang te vote thlak kalna leh hawna ngaihtuah sak an ni dawn a.  Pollstar hmangin darkar hnih dan zela vote tla report ECI lama thawn a ni bawk ang.

Champhai District Election Officer Dr Naveen Aggarwal, IAS chuan Champhai District mipuite chu khua leh tui tha  an nih lantira,  dikna leh mawhphurhna an neihte hlenchhuaka Vote thlak theuh turin a sawm a ni.