Champhai District Level  Border Area Development  Programme (BADP) Screening Committee chu vawiin tlai dar 6 khan  Champhai DC Conference Hall-ah DC Pi Maria C.T Zuali kaihhruaina hnuaiah an thukhawm. He hunah hian BADP Annual Action Plan 2020-2021 chungchang rel a ni. Meeting hi Champhai District huamchhunga MLA pathumte: 24-Champhai South A/C bialtu MLA Pu T.J. Lalnuntluanga, 25-East Tuipui A/C bialtu MLA Pu Ramthanmawia leh 23-Champhai North A/C bialtu MLA Dr. ZR.Thiamsanga te'n an telpui a ni.

He hun hmanpuitu Champhai district chhunga MLA  te chuan Champhai district Bawrhsap leh a thawhpui Officer- te chungah beiseina sang  tak an neih thu an sawi a. Lehkhathiam leh hnathawh dan kawng hmang hre zawk an nih angin district leh bial tana tha turah theihtawp chhuaha thahnemngai taka thawhhopuiah an sawm a. Champhai district-a thawhhona tha tak awm chu vawng nun zel nise an ti bawk.

Ramri depa awmte chawikanna tura Ministry of Home Affairs (MHA) buatsaih Border Area Development Programme kaltlanga Sawrkar laipui leh State Sawrkar atanga sum lokalte hman dan tur thlirhonaah hian Champhai District chhunga RD Block 2, Champhai RD Block leh Khawbung RD Block huamchhunga hmasawnna ruhrel siamna tura ruahmanna chhawpchhuahte chipchiar taka ennawn a ni a. Plan lo siam lawk senso tur leh allocation rawn kal turte enmil niin belh leh paih ngaite sawi ho a ni a. Siam fel ngaite siam fel vata khawrpum hnuah State Level Screening Committee hmaa pharh theih tura hmalak nise tih a ni bawk.

Kum  2020-2021 chhunga BADP sum allocation chu Champhai RD Block tan cheng nuai  293  leh  Khawbung RD Block tan cheng nuai 247  te a ni a, Champhai RD Block hnuaiah hian 23-Champhai North A/C leh 24-Champhai South A/C te an awma, Khawbung RD Block hnuaiah 25-East Tuipui A/C a awm bawk a ni. BADP sum dawn tur atanga 10%, Assam Rifles/BSF te hnathawhna tura ruat  cheng nuai 45 hman dan tur pawh enho a ni a. Thukhawm chuan hnathawh tura ruahmante bial tina khairual taka sem nise, hna ngai thehlut nawn anih lohna turin Department lamte nen inbiakrawna hmalak nise tih a ni.

 He hunah hian Pi Maria C.T Zuali DC, Pu Rex Zarzoliana Vanchhawng SP,  Pu R.Lalnghakliana PD DRDA, Pu Lalnunfela Chawngthu SDO Sadar, Pi R.Lalnunkimi BDO Champhai, Pu Benjamin Zalawma Ralte BDO Khawbung, Pu Lalduhthlana DFO,  Dr. R.Lianmawia CMO, Pu J.Kapkima EE, PHE, Pu T.T Laltanpuia DEO, Dr. Lallawmkima DIPRO, Pu Eddie C.Zothansanga EE PWD leh Assam Rifles hotute an tel a ni.