2949/2022-2023

Champhai, the 5th December, 2022: Champhai District chhunga Fostering Climate Resilient Upland Farming System in the North-East (FOCUS) hmalakna hrang hrangte ngaihtuaha ruahmanna siamtu, District Level Coordination Committee (DLCC) on FOCUS member-te chuan vawiin chawhnu khan an Chairman Pu James Lalrinchhana, District Bawrhsap hovin Champhai Zote-a FOCUS kaltlanga hmarcha sawngbawlna kawnga hmalakna an enfiah.

District Bawrhsap Pu James Lalrinchhana chuan FOCUS hnuaia project tha tak tak kalpui ani chu lawmawm tiin, mipuiten tangkai taka an chhawr theih nana tanrual a pawimawh a ni, a ti a. Fostering Climate Resilent Upland Farming System in North East (FOCUS), District Management Unit Champhai kaltlanga Mizo hmarcha tharte hralhna leh sawngbawlna buaipui ani chu remchang a tih thu sawiin, tharchhuah mai bakah a hralhna lam thlenga ngaihven tel chhunzawm zel a tul a ni, a ti a. Thingtlangpa Foods Limited Liability Partnership (LLP) te hmalakna chu fakawm tiin, sum leh pai dehchhuah leh midangte eizawnna an siam sak chu chhuanawm a ti a. Hmarcha lakkhawm leh hralh mai bakah, midangte tana lei itawm tur zawnga tih danglam bakah organic products anihna chawinun kawnga theihtawp chhuah turin a fuih a ni.

Thingtlangpa Foods Limited Liability Partnership (LLP) te hian Fostering Climate Resilent Upland Farming System in North East (FOCUS), District Management Unit (DMU) Champhai kaltlangin 'Processing & Branding of Mizo Chilli' tih project an kalpui mek a, hemi project atan hian Rs 49,98,903 ruahman a ni a, Rs 35,00,000 pek chhuah tawh niin, a bak la pek tur chungchangah vawiin khan hmalak tawhnate enfiah a ni.

Thingtlangpa Foods Limited Liability Partnership (LLP) te hian Mizo hmarcha tharte hi Khuangthing, Bungzung leh Tuipuiral khaw dangte atangin an lei khawm ber a, Kg-ah Rs 270/- in an lei a ni. Kum 2021 atanga bultanin hemi kum hian ton 1 vel an lei a, kumin chhung vawiin ni thlengin ton 9 vel lei khawm tawhin State pawn lamah an thawn tawh a. An la lei khawm mek zela, nakum January thla thleng hi chuan ton 25 thleng leia thawnchhuah theih an beisei a ni. Heng bakah hian hmarcha sawngbawlna hmunhma leh khawlte, Office thlengin an buaipui chho mek a, a enchhin nan tam tho lo tualchhunga tihral tur an siam a ni.

He hunah hian Pu M.S Dawngliana, District Project Manager, FOCUS, DMU, Champhai; Line Department hrang hranga DLCC member-te an tel a ni.

District Disaster Management Authority (DDMA) Chairman ni bawk Pu James Lalrinchhana hian vawiin chawhma khan nimin chawhnua Keilungliah tuikhuaha vanduaithlak taka tlahlum Pu Lalbiakliana (kum 33), Champhai Bethel Mualnuam ruang zawnga hnatlangte a thutchilh a. Hemi hnu hian vawiin chawhmaa Champhai Electric Veng, Vaihmuna vanduaithlak taka kangmei chhuak avanga Pi Rochhingpuii leh Pi Lalzamliani (L) te chenna in chhan hriat loha kangralte pawh a tlawh a; hmalak dante enfiahin khawtlang hruaitute a kawm a, hnatlangte thingpui inna tur a hlan a ni.