3607/2022-2023
Champhai, the 16th February, 2023: District Level Narco Coordination Centre (NCORD) Committee, Champhai District thutkhawm vawi 6-na leh kumin atana thutkhawm vawi hnihna chu vawiin chawhnu dar 1 khan an Chairperson Pu James Lalrinchhana, District Bawrhsap hovin DC Conference Hall-ah neih a ni.

Pu James Lalrinchhana chuan ruihhlo tawlh ruk leh man tamna, ramri depa awm leh ruihhlo do kawnga pawimawh em em Champhai District-ah tha thlah lova ruihhlo leh a kaihhnawihte do tlan zel a tul thu a sawi a. Ruihhlo do kawnga hmalakna hrang hrangte thlithlaia vil rengtu NCORD viak tha leh thahnemngai neih zel a pawimawh thu sawiin, ruihhlo laka India a fihlim theihna tura hmalakna Nasha Mukh Bharat Abhiyaan nena kalkawp tlat a ngai a ni, a ti a. Ram leh hnam run mektu ruihhlo do kawnga official, NGO, media, kohhran leh khawtlang mipuite inkara thawhhona tha tak Champhai District-in a nei chu fakawm a tih thu leh chhawmnun zel a pawimawh thu a sawi bawk.

NCORD Champhai District Convener Pu Lalrinpuia Varte, SP Champhai chuan ruihhlo do kawnga hmalaknate tarlangin, Champhai District chhunga District Administration, Police, Excise, Assam Rifles leh NGO te inkara tanrualna tha tak awm chu fakawm a ti a. Tum leh duhdan thuhmun nei, khawtlang leh ram himna tura thawk theuh kan nih avangin team anga lungrual taka thawhho zel a tul a ni, a ti a. NCORD pawimawh zia hriain Sawrkar laipuiin NCORD ruangamte a tih danglam nasat thu pawh tarlangin, India ram District hrang hrangte hmalakna NCORD portal-ah dahluh zel niin, hmalaknate inhriatpawh tawn vek theih a ni, a ti a. Ruihhlo tawlhruk kawnga a mawhphurtu dik tak, a phena awm lian thamte hlin fuha dan hnuaia hremna pek ngei an nih theih nana tanrual a pawimawh thu a tarlang bawk.

Vawiin thutkhawmah hian meeting hmasa January ni 27, 2023 a neih thurel bawhzui dan tlangpuite ngaihthlak a ni a. Narcotics Control Bureau (NCB) Branch Office, Champhaia bunna tur hmunhma February ni 7, 2023 ah enfiah a nih thu leh, NCORD Portal chu DC Office leh SP Office atangtein awlsam taka enfiah theih a nih tawh thu tarlan a ni a. Heng bakah hian NCORD leh NMBA kalkawp kaltlanga hmalaknate ngaihthlak a ni a. Ruihhlo leh a kaihhnawih laka fihlim tura inzirtirna Line Department, NGO leh Kohhran tangruala neih theih dan turte sawiho a ni bawk.

He hunah hian Champhai District Police leh Excise & Narcotics Department Champhaite hmalakna kaltlanga ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan tlangpuite Addl. SP Pu C.Lalengliana leh Asst. Commissioner of Excise & Narcotics Pu Vanlalvura Ralte te hnen atanga ngaihthlak a ni.

He huna tarlan a nih dan chuan NCORD meeting hnuhnung ber January ni 27, 2023 atanga vawiin February ni 16, 2023 inkarah Champhai District Police te'n ND&PS Act, 1985 hnuaiah case 6 an ziaklut a, hemi kaihhnawihah hian mi 7 man niin heng zinga 1 hi ramdang mi a ni. Heroin hawng 187 (gram 2354) man niin, Department lam chhut danin tualchhung market-a a hlut zawng Rs 56,10,000/- a ni a, hawng 9 (119 gm) man hi Assam Rifles nena joint operation neih kaltlanga man a ni. Alprazolam mum 450 (30 g), tualchhung rate-a Rs 15,000/- hu man a ni bawk a. Hemi hun chhunga ruihhlo man zawng zawng hlut zawng hi Rs 56,25,000/- a ni.

Hemi hun chhung vek hian Excise & Narcotics Department Champhai te'n ND&PS Act, 1985 hnuaiah case 3 ziaklutin hemi kaihhnawihah hian mi 5 an man a, heng zinga mi 1 hi ramdang mi a ni. Heroin gram 94, tualchhung rate-a Rs 1,12,800/- hu an man a ni.

Kumin bik January ni 1, 2023 atanga vawiin February ni 16, 2023 thlengin Champhai District Police-ten ND&PS Act, 1985 hnuaiah case 12 an ziaklut a, hemi kaihhnawihah hian mi 17 man niin heng zinga 4 te hi ramdang mi an ni. Heroin hawng 210 (2639.96 gm) man niin, Department lam chhut danin tualchhung market-a a hlut zawng Rs 63,00,000/- a ni a, heng zinga hawng 16 mante hi Assam Rifles nena joint operation vawi 4 neih kaltlanga man a ni. Ganja kg 6.35, a hlut zawng Rs 9,525/- man hu Assam Rifles nena tangkawpa man niin, Alprazolam mum 450 (30 gm), Rs 15,000/- hu an man bawk a. Ruihhlo man zawng zawng hlut zawng hi tualchhung rate-a chhutin Rs 63,24,525/- a tling a ni.