4575/2025-2026

Champhai, dated 24th February 2026: Nimin khan Champhai DC Conference Hall-ah Champhai District Level Road Safety Committee chu an Chairman, Bawrhsap Pu Mohammad Aaquib hoin an thukhawm a. District chhunga kawngpui hrang hrang dinhmun leh kawngpui hmangtute himna tur hrang hrang an thlirho.

He huna tarlan danin PWD hnuaiah kawng pathum - District Hospital - DC Office (nuai 62.64), Bethel Kawn - DFO (Eastern Circle) Office (nuai 14.42) leh Awmpui Phei - Vety Office (nuai 18.30) siam thatna turin tender chhuah a ni tawh a, tender te hi karleh thawhlehni ( March ni 3, 2026) ah hawn tur niin, hnathawh tan thuai beisei a ni a. Hei bakah hian SASCI hnuaiah cheng vaibelchhe 6 hmangin DK Point - District Hospital, Dawrkaikawn - Agriculture Department, PHE Road, Bethel Road - SP Bangla Junction, Vengthlang YMA Run - Govt Champhai College, Selluaia Point - Govt Champhai College, Chalchung Run - Vaihmun, Darthangvunga Point - NH -06 (via Saron Veng) siam tha turin ruahmanna a awm mek thu te, SASCI hnuaiah vek cheng vaibelchhe li Champhai khawchhung kawng thawmṭhatna tur hmuh beisei a nih thu leh Champhai- Tlangsam kawng siamṭhat nan cheng vaibelchhe 11.55 ruahman a nih thu tarlan a ni bawk.

NHIDCL te enkawl kawngpui chungchang te pawh sawiho niin, tun dinhmunah NH-06 thawmthat hna Khawzawl District lam atangin bul an ṭan mek thu an tarlang a. Hei bakah hian National Highway hlui (Chhungte- Tuipui Road) siamṭhatna tur cheng vaibelchhe 50 bawr vel ruahmanna an thehluh chu, thuneitu ten en tha tura an tih angin, ruahmanna hi an siam ṭhat hnuah an thehlut leh tawh bawk a ni.

Hei bakah hian PWD Highway Division te enkawl lai Champhai Kanan Junction-Zokhawthar siamṭhatna tur pawisa pawh Ministry of Road Transport & Highway in a pawmpui tawh thu tarlan a ni bawk.

Ṭhutkhawm thurel angin Champhai District chhunga kawngpui hrang hrang te thawm ṭhat enfiah turin - SDO(Sadar) kaihhruaina hnuaiah SP, PWD, Sub Headquarters YMA, DTO leh a paltlang khua/veng VC te telna District Level Road Monitoring Committee din turin ruahmanna siam a ni bawk. Hit and Run case chungchanga mipuite dikna chanvo zau zawka District mipui ten an hriat theih nan DIPRO leh DC Office ten ruahmanna an siam bawk ang.

He hunah hian Addl SP, Sr. EE PWD bakah NHIDCL, CMO , Sub Hqrs YMA leh DTO aiawh te an tel a ni.