No.1087/2020-2020

Pu Mark Lalthanliana, District Magistrate Champhai chuan Mizoram hmun tam tak, a bikin Myanmar ramri hrul khuaa veivah vel nana hman tlanglawn ber Kenbo Bike, China siam chelek chungchangah hriattirna tichhuakin, Ministry of Home Affairs thupek angin Kenbo Bike chelek leh hman khap anih thu a chhuah a ni.

Hriattirna hian India leh Myanmar sawrkarin Kenbo Bike chungchangah inremna thuthlung an siam loh thute, mi thenkhatin sawrkar atanga temporary registration-te pawh la a zalen takin an hmang thin ni a hriat a awm thu leh Foreign bike Myanmar atanga Mizoram chhunga lakluh chu dan kalh anih thu a sawi lang a. Kenbo Bike-te chu dan kalha lakluh an nih mai bakah mi thenkhatin sorkar phal loh thil phurh velna atan an hmang fo thin tih hriat a nih thu tarlan niin, Ministry of Home Affairs thupek angin Champhai district chhungah Kenbo Bike chelek leh hman khap tlat a nih tih hriattirna hi District Magistrate chuan a chhuah ta a ni. Thupek bawhchhiate chu dan anga an chungah hremna lekkawh anih tur thu tarlan ani bawk.