No.1546/2020-2021

Dated Champhai, the 1st June, 2020: Sawrkar ruahmanna kaltlanga Champhai district mi leh sa, Covid-19 hripui leng mek avanga Delhi leh West Bengal-a tangkhang rawn hawte chuan tukin khan tluang takin Champhai an rawn thleng a, anmahni lo dawnsawnna hmun tura ruat Vanlallawma Indoor Stadium (VANIS), Kahrawt-ah SP Pu Rex Zarzoliana, SDO Sadar Pu Lalnunfela Chawngthu, Addl SP Pu C.Lalengliana, Official dang, Medical Team leh Security Personnel-te chuan Bus 7 hmanga rawn haw Champhai district mi leh sa Delhi atangin mi 103 leh West Bengal atanga mi 6, an vaiin mi 109 te hi an lo dawngsawng a ni.

Tangkhang rawn hawte hi VANIS an rawn thlen veleh kut silfai tir zel niin, chawlhna room siamah chawlh hahdam tira ei leh inte pek an ni a. Hemi hnu hian Bus tina chuangte chu a tahtawl zelin Medical Screening Team 2 leh Rapid Test (RAT) Team 3 te’n an enfiah zela, Rapid Test an paltlang vek a ni. Tul dangte buaipui anih hnuah a dang zawngte hi awm khawmuang lovin sawrkar dana Ni 14 chhung inkhunghrang turin Quarantine Centre hrang hrangah te dahluh nghal an ni. Medical Screening leh Rapid Test-te neih zawh anih hnu hian chetvelna hmunhmate chu Health department Staff te’n 0.5 % Sodium Hypochloride hmangin an thian thianghlim leh vek a ni.

Delhi atang lo haw te hian zing dar 6 vel khan anmahni lo dawnsawnna tur hmun VANIS an rawn thleng a, an vai hian mi 103 (Mipa 35 leh Hmeichhia 68) niin, mi 91 (Mipa 29 leh Hmeichhia 62) te chu Tlangsam Polytechnic Quarantine Centre-ah khunghran an ni a, mi 5 (Mipa 3 leh Hmeichhia 2) te Champhai Tourist Lodge Quarantine Centre-ah dahluh an ni a, mi 3 (Mipa 2 leh Hmeichhia 1) te DPRC Quarantine Centre, Keifangtlang-ah dahluh an nih bakah, mi dang 4 (Mipa 1 leh Hmeichhia 3) te Home Quarantine an ni bawk.

Tukin veka lo thleng West Bengal atanga lo haw mi 6 (Mipa 2 leh Hmeichhia 4) te chuan zing dar 8:30 velah VANIS an lo thleng a, an vai hian PCI Dinthar Veng Kohhran Hall Community Quarantine Centre-ah dahluh an ni.

Heng bakah hian vawiina Shramik Special Train hmanga Bairabi Station lo thleng, Champhai district mi leh sa Goa atanga lo haw mi 65 (Mipa 15 leh Hmeichhia 50) te chuan naktuk hian Champhai an rawn thlen hman beisei ani a. An ni hi PCI Venglai Kohhran leh PCI Electric Veng Kohhran Hall Community Quarantine Centre-ah te khunghran an ni ang. Champhai district atanga ZMC a RT-PCR Test tura sample thawn 14 te an negative vek a ni.