Vawiin khan Champhai District Parking Committee chu Champhai khawpui chhunga Parking fee lak dan tur chungchang ngaihtuahin an Chairman Champhai DC Pu H. Lalengmawia hovin I&PR Conference Hall, Chanem Building-ah an thukhawm.

He thut khawmah hian DC chuan Champhai khawpui thang zelah lirthei veivah dan leh a dahna a mumal zawk theihna turin parking fee khawn chu thil tih awm taka nih thu leh, chumi tur chuan uluk taka thil kalpui erawh a tul thu a tarlang a. Vawiin thutkhawmah hian Champhaia parking fee khawn zat tur te, a lakna hmun tur leh parking fee khawn kalpui dan turte ruahmanin, he ruahmanna hi tun thla ni 15-a an thutkhawm leh hunah pharh leh a ni dawn a. Ruahmanna hi committee-in a pawm chuan State Transport Authority-ah parking fee khawn tura pawmpui turin thawn leh a ni ang. Meeting-ah hian Member Secy Pi V. Lalmuanpuii, DTO chuan parking fee khawn tura inkaihhruaina leh dan zawm lote hrem theihna te a tarlang a ni.

Thutkhawm neih hnu hian committee member te chuan parking fee khawnna tur hmunte hi a tlawhin ruahmanna an siam nghal a ni.