Champhai Police Station Conference Hall-ah Police Officer-te tan Special Laws Of Module chungchangah inzirtirna beihpui nimin a tan chu vawiin khan neih chhunzawmin, COTPA Act leh FSSAI bakah hmeichhiate dikna humhalh chungchang zirho a ni.

Training-ah hian Pi V.Vanlalmuanpuii, District Consultant chuan vaihlo khuahkhirhna Dan, COTPA Act kenkawh danah zirtirna pein, he dan hnuaia police te tangkaina leh mawhphurhna hrang hrang bakah, COTPA Act in a huam chin leh a khuahkhirh chin te a tarlang a. Pi Lalremruati, Psychologist chuan vaihlo in taksaa hna a thawh dan te, rilru lama nghawng a neih danah chipchiar takin zirtirna a nei a ni.

Pi V. Vanlalmuani hnen atang hian mipuite hriselna humhim nana eitur thianghlimna leh a kaihhnawih enfiahtu FSSAI (Food Safety and Standards Authority of India) pawimawhnate a sawifiah bawk.

Training-ah hian Pi H.Vanlalzawni, DSP, Champhai hnen atangin hmeichhiate laka hleihlenna leh a hrem theihna dan chungchang bakah Police-te mawhphurhna hrang hrang ngaihthlak a ni bawk.

Vawiin training-ah hian zawhna leh chhanna hun hman a ni a, Champhai SP Charge la mektu Pu VL Lura Hauzel Addl SP chuan training hi a hmanpui a ni.