Tunlai khawvel pum ngaihven leh  ram hrang hrangte buaipui mek Novel Coronavirus Disease (Covid-19) laka lo invenlawkna tura  Champhai District chhung Myanmar ramria  hmalakna hrang hrangte chu vawiin khan District Administration, Police, YMA leh Chanchinbumi te'n thuang hrang hranga insiamin ramri depa venhimna hmun 13 te an enfiah a ni.

Pu SL Naveen, Champhai Bawrhsap; Pu Rex Zarzoliana, SP;  Pu Mark Lalthanliana, Addl DC; Dr. Lallawmkima, DIPRO;  Sub-Hqtrs YMA Champhai leh MJA Champhai District hruaitu thenkhatte  chuan India leh Myanmar ramri inkalpawhna puiber Zokhawthara Medical Screening leh Security duty neih mekte an tlawh bakah, khawtlang hruaitute nen inrawnkhawmna an nei a. Ramri kaltlanga ei leh in lakluh  pawh mihring indek lo a inbanleta kal tir thar niin, kut silna siam dan turte rel a ni a. Bulfekzawl hmuna Police duty  leh Champhai Zotlanga YMA duty-te an tlawh bawk.

Heng bakah hian Addl SP Champhai  Pu C. Lalengliana Team, SYMA leh MJA hotute bakah  SDO Sadar Champhai Pu Lalnunfela Chawngthu Team te'n Tlangsam, Zote leh Ngur  leh a chhehvel kaltlanga inkalpawhna venghimtu  Police leh NGO duty enfiahin an tlawh a. DSP Hqtrs  Champhai Pu C.Lalengliana Team te'n  Hnahlan tlangdunga duty post hrang hrangte an tlawh a. SDPO Champhai Pu C.Lalsawta Team leh Pu Benjamin Zalawma Ralte, SDC Champhai Team te'n Farkawn tlangdung ramri depa duty post hrang hrangte enfiahin an tlawh bawk a ni.

Tlai lamah Champhai Circuit House-ah inhmukhawmin thil hmuh dan tlangpui sawiin hmalak dan turte rel ho a ni a. Thukhawm chuan Champhai District Myanmar ramri depa awm khaw  mipuite chu sawrkar hmalakna te tha taka tawiawm chhunzawm zel turin a ngen a. Natna  kaidarh awlsam tak leng darh tur venlawk kawnga thahnem ngai taka thawktute chungah lawmthu sawiin, kan zavaia tana tha tur sawrkar hmalaknate thlawp zel turin a ngen bawk a ni.

Champhai District Magistrate Pu SL Naveen, IAS chuan vawiin khan thupek chhuahin, loh theih lohna avanga ramri kan turte tan DC/SP hnen atangin ziaka phalna lak hmasak angaih tawh thu leh Sub-Hqtrs YMA hriatpuina hmangin  DC leh SP hnen atanga phalna lak hmasak phawt angaih thu a chhuah a. Ramri kan turte tan  Zokhawthar Check Post chauh kaltlanga kan tur anih thu leh Medical Screening neih vek angaih thu a chhuah a. Tin, heng bakah hian Zokhawthar kaltlngin nitin mamawh ei leh in te Police/Custom/Assam Rifles-te endik hmasak chauhlo chu bungraw dang engmah lakluh phal anih loh thu a chhuah bawk a ni.

Vawiin March Ni 14, 2020 thlenga Medical Screening Zokhawthara neih zat hi mi 1000 niin, February thlaah mi 302, March thla vawiin Ni 14, 2020 thlengin mi 698  an ni a, Covid-19 vei hmuh chhuah an la awm lo a ni.