524/2023-2024

Champhai, the 22nd May, 2023: Champhai District chhunga leichi lakluhte thlithlaia dan ang taka hralhchhuah a ni em tih leh, dan lova tawlh ruk a awm em tih endik tura Sawrkarin a din, Champhai District Vigilance Committee on Fertilizers chu vawiin chawhma dar 11 khan an Chairman Pu James Lalrinchhana, District Bawrhsap hovin DC Conference Hall-ah an thukhawm.

District Bawrhsap Pu James Lalrinchhana chuan loneitute'n an chanpual leitha (fertilizer) kokim taka an hmuh theih nana ruahmanna siam chu Sawrkarin a ngaih pawimawh thu sawiin, Fertilizer Dealer-te chu loneitute chanvo an kuta a thlen ngei theih nana theihtawp chhuah turin a chah a. Dan ang taka leithate hralh chhuah a nih chuan buh leh bal thar chhuah kawngah hlawk zawkin kan kal thei dawn a ni a ti a. Champhai tana Sawkarin man tlawm zawk subsidy-a fertilizer a pekte chu hmun danga pawhpen a nih loh nante, Champhai District chhunga dan lova leichi tawlhruk thinte ven leh dap kawngah theihtawp chhuah tlan a pawimawh thu a sawi a. District Vigilance Committee on Fertilizers-in tha taka hna a thawh theih nan hmalaknate inhrilhhriat zung zung leh, dan leh dun leh inkaihhruaina siamte tha taka zawm tlan a tul thu a sawi bawk.

DAO Champhai Pi R.Lalramhluni, Member Secretary, District Vigilance Committee on Fertilizers chuan loneitute mamawh a ni tih hriain Sawrkar laipuiin khua leh tuite tan subsidy sang tak siami leitha a chhawpchhuah thu sawiin, hemi atan hian Sawrkar laipuiin sum vaibelchhe tam tak a seng a, kan vanneihna hi tangkai taka kan chhawr thiam a tul a ni, a ti a. Dan leh dun mumal tak hmangin fertilizer tawlh leh tihral dante khuahkhirh a nih thu sawiin, fertilizer hmangin za zela 30-40 laiin buh leh bal thar a pung thei tura ngaih a ni a ti a. Ram a bua tawh avangin thingtlangah pawh kum 5 lengahte thlawhhma lak a nih tawh thu a sawi bawk.

DAO Champhai chuan Agriculture Department-in kumina ngun taka zirchianna an neih dante tarlangin, April thla quota atana hemi dungzuia fertilizer sem chhuah dan tur (Village Wise Tentative Allotment of Urea April 2023) duante tarlangin a sawifiah a. Dealer Godown-ah a kimbiaia thlen a ni em tihte, khawtual loneitute'n an dawng ngei em tih leh hmun danga hralhchhawn a awm em tihte YMA nena tangkawpa enfiah thin tum a ni, a ti a. Champhai atangin mimal anga la tawh lovin khawtin tana allotment siamte a hlawma lain mahni khuaahte rualkhai taka sem chhuah tawh tura ruahman siam a nih thu sawiin, mahni chanai hralhte erawh pek tawh loh tur a nih thu a sawi bawk.

He hunah hian Fertilizer Dealer-te hnen atangin report ngaihthlak a ni a. Harsatna awm leh chinfel dan turte ngaihtuahho a ni bawk a. Tun dinhmunah April 2023 quota Champhai District chhunga Fertilizer Dealer 4; CR 2&3 Wheelers Work Vengthlang, Mami Store Venglai, LM Enterprise Zotlang, F.Nghaka & Sons Vengthlang te'n 70.83 Metric Ton/Bag 1574 (Kg 45 zel) theuh dawngin Godown an thlenfel vek tawh a ni. April 2023 quota allotment duante pawh a tul anga siamrem niin, Dealer Godown atanga pekchhuah hun atan Thawhtanni, Nilaini leh Zirtawpni-te ruat a ni a. Urea man hi Dealer Godown-ah bag khat (Kg 45) Rs 500/- a lei theih a ni.

Thutkhawmah hian Urea hman avanga lei khawn tawh ti dur tha leh tura hman thin Mukta Power hralh chhuah kawnga hmalak dante pawh ngaihthlak a ni a, loneitute'n man man zawka an lei theih nana hmalak tulte pawh sawiho niin a rate-te pawh siamrem a ni bawk.

District Agriculture Office, Champhaiin tunhnaia zirchianna a neihin a tarlan dan chuan Champhai khawpui huam mai bakah khaw 43 ahte agriculture sector, thingtlang leh phai lo nei an awm a; heng bakah hian horticulture sector hnuaia huan nghet nei an awm nual bawk a ni. Lei hanna kum tina lo da ve zel avang leh duhkhawp leichi hmuh tur a awm loh avangin buh leh thlai chin a hlawk lo zel a, eizawnna danga insawn an awm chho mek zel a ni. Champhai leilet hectare 593.36 a zau pawh leichi duhkhawp hmuh loh chuan buh leh bal hlawk takin a thar chhuah theih tawh meuh lo a ni.

Kumin Kharif season 2023 April thla bik atan hian Mizoram chuan Sawrkar laipui atangin Brahmaputra Valley Fertilizer Corporation Limited (BVFCL) Company kaltlangin quata Urea Metric Ton 2,000/Quintal 20,000 a man tlawm subsidised rate-in a dawng a. Heng zinga Metric Ton 283.32/Bag 6296 (bag khat kg 45 ang zela chhut) hi Champhai District tana ruahman a ni. BVFCL company kaltlanga Champhai District tana leichi supply tura pawmpui approved dealer 4 te chu chanpual Quintal 708.3 (bag 1574) theuh pek an ni.

He hunah hian District Vigilance Committee on Fertilizer inkaihhruaina leh hmalak dan turte, dan tlawhchhan hrang hrangte zirho a ni a. Loneitute hmakhua ngaiin dan lova leichi lakluh, kawl leh tawlhruk ven kawnga tanlak zel a tul thu tarlan a ni a. Approved dealer nilo te, State dang leh District dang qouta leichi tawlhte chu man zel tura tih niin, District qouta-te pawh hmun danga tawlhruk a nih loh nan thlithlai nise tih a ni a. Champhai District Vigilance Committee on Fertilizer chuan leichi phurh, kawl leh zawrh chhuah chu Sawrkar pawmpui approved dealer-te tan chauha tih a nih thu leh, ruat bik nilo tena lo tih ve ngawt chu danin a khap tlat thu a tarlang a. Dan pawisa lova ti lui man chhuahte chungah dan anga hremna lekkawh theih a nih thu a tarlang bawk.

Meeting-ah hian SDO Sadar Pi V.Lalmuanpuii, Addl. SP Pu Lalmalsawma Hnamte, Fertilizers Inspector & ADAO Champhai Pi Lalzarzovi; Assam Rifle Champhai OC Maj Asha Ram, Member dangte leh Fertilizer Dealer-te an tel a ni.