No.5131/2020-2021 

Dated Champhai, the 16^th September, 2020: Vawiin khan Champhai District Water & Sanitation Mission (DWSM) chu Chairman Pi Maria C.T Zuali, District Bawrhsap kaihhruaiin DC Conference Hall-ah an thukhawm. Kum 2024 a thingtlang khua in tinte hnena tui thianghlim pek vek hmanna tur ‘Jal Jeevan Mission (JJM)’ hnuaia Champhai district chhunga hmalak tawhna leh hmabak hlen kawnga ruahmanna siamte ngaihtuahho a ni. 

Champhai District Water & Sanitation Mission Chairman Pi Maria C.T Zuali chuan Jal Jeevan Mission kaltlangin Sawrkar laipuiin thingtlang khuaa in tinah tui thianghlim in tur pek vek a tum thu sawiin, mi pakhat zel tan nitin tui thianghlim litre 55 pek  tum a ni, a ti a. Tui thianghlim hnianghnar leh nitin mamawh phuhru tur nakin zela nei thei tur chuan tuihna siamtu ramngawte kan ven him angaia, hemi kawngah hian line department dangte pawh an tangkaiin mipuite zirtir kawngah tan an lak angai hle dawn  a ni, a ti a. New Education Policy hnuaiah Vocational Course-te ngaihpawimawh anih dawn avangin line department hotute chu hemi lam kawnga inzirtirna zau zawk  nei thei tura ngaihtuahna seng turin a chah nghal bawk a ni. 

He hunah hian Er.J.Kapkima EE, PHED Champhai WATSAN Division & Member Secretary, District Water & Sanitation Mission hnen atangin  Jal Jeevan Mission awmzia leh a tumte, district chhunga kalpui dan leh hmabak tlangpuite ngaihthlak a ni a. Hnathawhna tur sum Sawrkar laipui atanga lokalte khaihlak chang awm thin mahse kum 2024 ah Jal Jeevan Mission thil tumte tihhhlawhtlin hman ngei tuma theihtawp chhuah mek zel anih thu a sawi a. Er.Vanlalmuanawma, SDO, PHED Champhai WATSAN Division hnen atangin Village Action Plan (VAP) leh Draft District Action Plan (DAP) chungchang  ngaihthlak a ni bawk. 

Vawiin thukhawm chuan thingtlang khaw tina tui thianghlim mamawh dan leh senso ngai thei tur tarlanna Village Level Action Plan (VAP) duante thlir hoin, Draft District Action Plan (DAP) chu chulmam anih hnuah kum 2024 thleng  Physical & Financial Action Plan atana sum ruahman Rs 84,41,51,200 /- chu pawm a ni a. Line department hrang hrangte nena thawhdun theihna  turte pawh ngaihtuahho niin, Jal Jeevan Mission hmalakna chu nakin zel atana hlawhtling leh tangkai tak, tui thianghim hnianghnar leh tuihnate vawnhim kawnga pawimawh tak anih theihna turin theihtawp  chhuahho zel nise tih a ni. Champhai Project Sub-Division leh Khawbung WATSAN Sub-Division  hnuaia SDO/AE-te chu Nodal Department an nih angin an huamchhung theuha Works Manager-ah ruat an ni bawk. 

Jal Jeevan Mission (JMM) hi National Rural Drinking Water Programme (NRDWP)  thlaktu niin, 2019 khan kalpui tan a ni a. He Mission kaltlang hian kum 2024 ah chuan thingtlang khaw in tinah tui tianghlim nitin mi pakhat zel tan litre 55 pek tum a ni. School, Anganwadi, GP Building, Health Centres, Wellness Centres leh Community Building-ahte pawh tui pek vek tum  a ni. Khaw mipuite hnenah neitu thinlung tuha a enkawl zel kawngah pawh tanla tura zirtirna pek tum a ni a, tui thianghlim in tur pek mai bakah tuihna humhalh leh ven kawngah hmalak tum a ni bawk. National Level, Sate Level, District Level leh Village Level-ahte  Water & Sanitation Committee inkhaidiat felfai tak din niin, Champhai District Water & Sanitation Mission pawh May Ni 12, 2020 khan din  a lo ni tawh a ni. Khawtin atanga tui mamawh dan Village WATSAN Committee leh PHE Department-te siam Village Action Plan (VAP), Gram Sabha-in a pawmpuite chu District Action Plan (DAP) hnuaiah thun thin an ni. 

Champhai District chhunga thingtlang khuaaah  tui connection siam sak ngai In 9,197 an awm a, heng zinga 514 te chu National Rural Drinking Water Programme (NRDWP) kaltlangin tui connection pek an lo ni tawh a. Jal Jeevan Mission kalpui anih hnuah In 714 te tui connection pek belh leh niin, tui connection pek ngai la awm zat  chu In 7,969 a ni. Tun dinhmunah thingtlang khaw  12 ahte hmalak niin, New Samthang, New Hruaikawn, Bulfekzawl leh Lianpui khuaahte hna thawh zawh tawh a ni a. Vaparah za zela 75, Khuangthing leh  Tualchengah za zela 50, Kelkang, Phaibawk/Saikhumphai, North Khawbung leh Dilkawn khuaahte za zela 25 zawh tawh niin, Mualkawiah hna za zela 15 zawh tawh a ni bawk. Lungphunlian, Vaikhawtlang, Zawlsei, Sesih, Farkawn, Thekte, Khawbung, Zokhawthar leh Tuipui khuaahte hian kum 2020-2021 chhung hian hmalak tum a ni bawk.