Vawiin khan AH&Vety Department Rapid Response Team chuan Champhai a vawkvulhtute hnenah ramri kana ran hrileng thei (Farmers' Training on Transboundary Animal Diseases) chungchang leh a laka inven leh do let dan tur ah Champhai Town Hall-ah zirtirna an pe.

Champhai leh a chheh vela vawk hrileng (PRRS) vanga vawk tam tak a thih chungchangah hetiang chhiatna thlen thulh a vulhtute chungah hlohna nasa zawk a thlen lohna tura he hrileng nihphung leh a thawh dan vawkvulhtute hnena zirtirna hi Champhai DVO Dr. Lalchungnunga'n a kaihruai a.

AH & Vety Joint Director Dr. Hmarkunga chuan tuntuma PRRS hrileng vanga vawk tam tak a thih phah dan leh Mizoram chhung hmun hrang hranga vawk thih dan tarlanna a nei a. He khuarel chhiatna avanga vawkvulhtute chhiat tawhna chu Sorkarin pawi atih thu a tarlan rualin Mizoram a vawk thi tawhzat chu 2984 (Champhai 2679, Lunglei 221, Lawngtlai 50 leh Serchhipah 34) anih thu a sawi tel nawk.

AH & Vety Officer Disease Investigation Wing Dr. Estheri Lalzoliani chuan Vawk chunga natna chi hrang hrang a tarlan zingah tunlaia hrileng mek PRRS hi 1987 ah US-ah alen tan thu a sawi lang hmasa a. PRRS hri vei tawh vawk dam leh tate hi hrileng pudarhtu anih theih thu leh hrivei dam leh vawk vulh chhun zawm anihin chithlah kawngah harsatna an neih tawh thin avangin talh mai a that zawk thu a sawi a.

PRRS laka fihlim thak tur chuan he hri vei tawh vawk zawng zawng tihral vek chu a him ber thu sawiin, tuntuma PRRS hrileng bultanru hi 2013 a hrivei vawk dam leh in a thehdarh nge hmun dang atanga lakluh put darh zawk tih chiang taka hriat anih loh thu a tarlan pahin, he hei lo taidarh tanna tak hi mithiamten Bhopal a an enfiahna atangin a hriat theih tur thu a sawi. Hri vei dam leh vawkte pawh thla khat tal ngaihchan phawt a that thu a sawi.

He hrileng laka him turin vawk pum emaw a sa hmun pakhat atanga hmun danga lak sawn miah loh tur anih thu Dr. Estheri chuan a sawi bakah he PRRS hri hi vawk taksa aluh atanga ni 14 aia tlai lovah a lanchhuah thin thu a sawi bawk.

Vawkvulhtuten hriatna zau zawk an neih theih nan Dr. Estheri chuan Swine fever chungchang sawifiahna a nei a. Zawhna leh chhanna hun hman anih rualin sawihona hun hmanzui nghal a ni.

Rapid Response Team-te hian naktuk hian Bungzung a vawk thi enfiahna an neih dawn bakah ramri (Zokhawthar)-a vawk pawh an enfiah nghal a dawn a ni.

Attachment

  • Loading attachment...