4572/2023-2024

Champhai, the 15th April 2024: Nimin April ni 14, 2024 khan India ram hmun dangte rualin Champhai Fire Station chuan National Service Day cum Martyrs' Day an hmang. Zing dar 9-ah kum kalta 2023 chhunga kang thelh pawl, kangthelhna avanga nunna chante sunna hun an hmang a, kum kalta chhung khan India ramah kang thelh pawl mi 3 kangthelhna avanga nunna chan an awm a ni.

Champhai Fire Station Officer Pu F. Lalchhandama chuan tunlaiin khua a sangin a lum zual thu leh khua a ro thu sawiin, mipuite kangmei laka fimkhur turin a ngen a. April ni 1, 2023 leh March ni 31, 2024 chhungin Champhai Fire Station-in kangmei chhuah hriattirna fire call tum 23 lai a dawn thu sawiin, in, dawr leh thlam kang avangin tum 8 lai an tlan chhuah thu leh hemi avang hian bungraw kang ral hlut zawng chu Rs 9,86,000 a nih thu a tarlang a. Chenna in tana hlauhawm dai hnai kang thelh tura tum 15 lai an tlan chhuah thu a sawi bawk a. Kangmei a chhuahin Champhai Fire Station biakpawhna number 03831-234026/7628029288 ah hriattir vat zel turin mipuite a ngen bawk.

Kumtina an tih danin April 14 atanga ni April ni 20 chhung hian 'Kangmei lakah fimkhur la, ram tan tha thawh ve rawh (Ensure fire safety, contribute towards nation building)' tih thupui thlan hmangin Fire Service Week hman zui a ni dawn a. Ruahman dan chuan kum 2024 Fire Service Week pual hian Champhai Fire Station chuan School leh Hospital thlan bikah Fire Safety Training cum Fire Safety Inspection an nei dawn a. Kangmei chhuah thulha Fire Station biak pawhna sticker a tam thei ang ber an sem bawk ang.