Vawiin khan Champhai Grape Growers Society chuan General Body Meeting vawi 12 na chu Tlangsam Winery ah an nei a, he hun hi Environment & Forest etc changtu Minister Pu TJ Lalnuntluanga chuan Khuallian niin a hmanpui. 

Khuallian chuan MIP sum hmanga bultan tawh Tlangsam Winery chu  theihtawp chhuaha tihhmasawn leh tum a ni a,  Zu khapna dan siamah Winery ngaihhnathiam anih theihna turin hmalak a ni, a ti a. Champhai Grape Growers Society member-te chu neitu thinlung pu chunga hnathawk tur leh taihmakna, rinawmna leh beidawng mai lova tih tak takna nena hmalam pan turin a fuih a.  Intodelh tura tanlak kawngah  zau taka a inhawn thu leh  mimal taka finchhuah a tawiawm turin a sawm bawk. 

Minister chuan  Grape Winery tundin zelna tura hruaitu fel,  thahnemngai tak takte leh Horticulture Department-te hnathawhah lawmthu a sawi a.  Hmun nghet siama grape huan enkawl  chuan thing leh mau chereu tur a veng tel avangin hetiang zawnga eizawnna kalpui chu nakin hun ngaihtuaha thil tha tak a ni, a ti a. Champhai Grape Growers Society-te an kalzelna turah duhsakna hlanin Mizoram tana intodelhna kawnga tha thawh zel turin a chah a ni.   

He hun hi Pu HS Vanlalfakzuala, Chairman, Champhai Grape Growers Society in a kaihruai a. Pu C.Zohmingliana, Secretary-in report a pe a. Pu Zoremthara Ralte SDO Sadar Champhai, Pu CH Lalmuanpuia,  Deputy Director Horticulture Department leh Pu R.Lalremliana,  DHO Khawzawlte pawhin Champhai Grape Growers Society hmalakna te fakin an kalzelna turah duhsakna an hlan a. Pu C. Malsawma, Treasurer in lawmthu sawiin hun a khar a ni.

Champhai Grape Growers Society hi kum 2007 a din niin tun dinhmunah member 148 an awm mek a. Grape sawrna khawl Winery hi July Ni 16, 2010 khan hman theih tura peihfela hawn a ni a. Winery capacity hi quintal 2000 a ni a, kum 2015 khan Grape quintal 1682 sawrin tun thlenga an sawr tam ber kum niin, nikum 2018 chhung khan quintal 729 an sawr a ni. Grape Wine te hi a hlawmin kum 2018 thleng khan M/s Radiant Manufacturers Pvt Ltd chuan a la thin a. Baptist Church Mizoram chuan Sacramental Wine tur an siam tir a, Mizoram chhungah Champwine an zuar chhuak bawk a ni.

Winery tundinna kawngah hmalak zel a ni a, Grape hmun tuaitharna turin Cheng nuai 45, Winery tihlenna tur Cheng nuai 60, GI Pipe phumna  tur cheng nuai 10, building sakna tur cheng nuai 15, Cool Room 2 siam leh Fertilizer dealership-ah te Sawrkar atanga puihna dawn a ni a. Heng bakah hian a lakkhawmna leh a hralhna lam tur buaipui mek a ni a. Winery tihlenna tur sum hmang hian Zem lian 10 lei belh leha Capacity quintal 3000 a tihlen  tuma inbuatsaihna neih mek a ni bawk.