No.13/2021-2022

Dated Champhai, the 3rd April, 2021: Champhai khawpui fai, mawi leh hrisel siam kawnga hmalakna kal zelah vawiin khan  Champhai khawpui chhunga Village Council hrang hrangte leh Sub-Hqrs YMA Champhai bultumin, Champhai khawpui tui tlan ber Tuipui leh a fintu kawrte thenfai hnatlang neih chhunzawm a ni. Vawiin hnatlang hi Law & Judicial Minister Pu T.J. Lalnuntluanga, Champhai South bialtu MLA chuan a tlawh bakah, Pi Maria C.T. Zuali, Deputy Commissioner/Chairman, Clean, Beautiful & Healthy Champhai Committee leh Official dang te'n an telpui a ni.

He hunah hian Plastic/Polythene leh hnawmhnawk hrang hrangte thenfai niin, Tuipui hnar leh Tuipui pawhtu Keilungliah lui te chu Champhai khawpui huamchhung veng hrang hrang ten chan hrang hrang insiamin an thianfai a. Hriat theih chinah vawiina hnatlangah hian veng 13 atangin in mi 2691 an thawkchhuak thei a ni. Vawiina hnatlang remchang lo vengte pawh an remchan hunah an hnatlang dawn bawk a ni.

Khawpui thli leh hnawmhnawk chhek khawlna lui kawrte chu thenfai tuma theihtawp chhuah mek zel a ni a, fur ruahtlak hma ngeia theihtawp chhuaha thenfai hna kalpui chhunzawm zel tum a ni a. Clean, Beautiful & Healthy Champhai Committee chuan Champhai khawpui fai, mawi leh hrisel siam tura tan lak kawngah khawtlang mipuite chu neitu nihna thinlung pu chunga thahnemngai taka  thawhhopuiah a sawm a ni.

He hunah hian faina kawnga hmasawn a tulziate tarlan niin, luipui hnara awm te'n bawlhhlawh sawngbawl leh paih danahte hmasawn tuma ngaihtuahna an sen a tul thute tarlan niin, Champhai khawpui tui tlan ber Tuipui hna humhalh leh bawlhhlawh leh chemical laka a lo fihlim theihna kawnga tanlak ngaihnate hnatlang kaltlang hian inzirthar a ni.

Khawchhak Tuipui hi Champhai khaw pawn mai Khankawn kianga hnar nei niin, Champhai Leilet phaizawlah luanglutin Champhai khawpui a helkual zet hnuah a chhimluan a ni. Leilet phaizawl buh leh thlai chawmtu  pawimawh tak a nih bakah hian Champhai khawpui tui tlan ber a ni bawk.