Vawiin chawhma dar 11.00AM khan Champhai Town Planning and Development Committee chu Chairman, Champhai North bialtu MLA Pu T.T. Zothansanga hovin an thukhawm a, Champhai Master Plan leh hmasawnna tura ruahmante an thlir ho.
Chairman chuan thuhma sawiin Champhai khua hi kum 1956 khan Sub Town ah puan a ni a, kum 1974 ah SDO(Civil) in a thutchilh tan a, kum 1989 ah a chhehvel khua Hmunhmeltha, Zote, Tlangsam, Ruantlang, Zotlang leh Chhungte te chu Town Area ah rinluh an ni a, kum 1998 khan Champhai chu District ah puan a ni leh ta a, heta tang hian hmasawnna pawh chak takin a kal chho ta a ni, a ti. Pu T.T. Zothansanga chuan kum 10 chhungin nasa takin khawpui a thang a, thil tam tak a lo danglam a, mihring pawh nasa takin kan punga, chuvangin Town Plan pawh hi kum 10 dan zelah ennawn a ngai thin a ni, a ti. Khawtlang hruaitu leh Department hotute pawh inthlakkual reng kan nih avangin Committee Member pawh athar veka din a ni, a ti bawk.
Member Secretary, Pu Ralthuama Ralte, Deputy Director of Town Planning, UD&PA Department ni bawk chuan report pein tun tum hi kan Chairman hova kan thutkhawm vawi 2-na a ni a, meeting hmasa-in a lo rel tawh angin Champhai Master Plan hi buatsaih a ni a, hemi hnu hian sawisel duh neite tan sawi selna hun hawn leh a ni a. Champhai Master Plan buatsaih anih lai, kumin kum tirah khan Champhai-ah hian mihring 41,126 awmin In dinglai (household) 7406 a awm a, Village Council 16 a awm bawk a, tun hnai VC inthlanah khan Zion Veng leh Vengthlang North a piang a, tunah hian VC 18 a awm mek a ni, a ti a. Tuna Champhai Master Plan kan buatsaih hi tuna meeting hian a approve turin kan rawn chhawpchuak a ni, a ti bawk.
Hemi hnu hian Champhai Master Plan chu Member tin hnenah semin sawizui ngaite sawiho zui nghal a ni a, Member ten sawisel ngai lai leh siamthat ngai lai nia an hriat te huam zau takin an sawiho a ni.
He meeting-ah hian Champhai DC Pu Vijay Kumar Bidhuri bakah Master Plan in a kaihhnawih theih Department hrang hrangte, Sub-Hqrs. YMA hruaitute leh Town Area chhung a VCP te an kal tha hle.
