Guahati High Court Chief Justice, Pu Ajit Singh-a chuan July ni 2 a Guahati High Court Judge Pu Michael Zothankhuma leh Champhai District thuneituten Champhai District Session Court din a nih theih nana an hmalakna hrang hrangte bawhzui nan Champhai a tlawh a, District thuneituten Court building thar sak zawh hmaa luah lailawk tura an ruahman, Zote-a IIDC hmunhma enin sawrkarin IIDC building a luah tir theih chuan hun reilote chhunga Champhai District Session Court dinfel a nih tur thu a sawi.

Guahati High Court Chief Justice, Pu Ajit Singh-a chuan Champhai District Court building, Tlangrawt a mi tlawhin District Court thuneituten an lo dawngsawng a, an harsatna leh a sutkian dan turte an sawipui a. Zote rama Court building thar sakna tur ram pawh a hmunah enin building sak hna tan thuai a nih theih nana hma la turin thuneitute a ngen bawk. Chief Justice Pu Ajit Singh-a chuan Court building thar sak zawh hmaa Session Court luah lailawk tura ruahmanna kal mek, IIDC hmunhma pawh tlawh nghalin lungawithlak a ti hle a. Hemi hnua District Official-te nena Circuit House-a inkawmna an neihah Pu Ajit Singh-a chuan sawrkarin building luah lailawk tur a ngaihtuah sak theih chuan Champhai District Session Court dinfel nghal a nih tur thu a sawi a ni.

Champhai District Session Court din a nih theih nan hian sawrkar leh tlawmngaipawl ten kawng hrang hrangin hma an la a. Tunah hian DC Office chuan GAD lamah Court building atana IIDC building hmanhawh dilna an thehlut tawh a ni.

Chief Justice hi Guahati High Court atangin Judge Pu Michael Zothankhuma, Registrar General Pu H.K. Sharma, Registrar-cum-Principal Secretary to Hon’ble the Chief Justice Pu Ratkim Duarah, , Secretary to Hon’ble the Chief Justice Pu Sailendra Choudhury leh Gauhati High Court Aizawl Bench Registrar, T.L. Guite ten tawiawmin Champhai District Bawrhsap Pu Vanlalngaihsaka, IAS leh District Official-te bakah NGO aiawhten an lo dawngsawng a ni.

Chief Justice hian nimin, July ni 28 khan Champhai thlengin vawiin chhun khan Aizawl panin a chhuahsan leh a ni.