Kum engemaw chen atang khan Champhai Kanan Veng leimin cuan kumtin fur laia mipui leh lirthei tan harsatna a siam thin avangin he hmun siam hna hi thawh tan a ni ta a. He hna hi Champhai DC Pu H. Lalengmawia kaihrhuaina hnuaia Committee din, Disaster Management on Kanan/Vengthlang Landslide enpuina hnuaiah thawh a ni.

Champhai DC chuan Champhai mipuite muttui theih nan leh supply line chah loh nan fur ruahpui dawn hma in leimin siam tur hian thuneitute hnenah thlen a nih hnu ah, Chief Minister leh DM&R Minister Pu C. Ngunlianchunga leh Secretary-ten thahnemngai takin hna thawh theih tur hian ruahmanna an rawn siam sak hnua hna hi thawh a nih thu a sawi a. DM&R Minister bakah Minister dangte pawhin a hmunah ngei an enfiah tawh thu tarlangin; a hma thei ang bera thawh zawh a nih theih nan lei lai khawl leh hmanrua dang mamawh tur te chu Tarmat leh Pioneer atangin hawh a nih bakah a tul angin hnatlang te pawh koh a la ngaih tur thu DC chuan a sawi bawk.

Leimin siam hna hi nimin (30.6.2015) khan thawh tan a ni a. Vawiin khan Champhai DC, SE PHED, Addl. SP, SDPO, PD DARDA, DIPRO leh Sub Hqtr YMA President ten a hmunah tlawhin hnathawh an enfiah a. Hna thawh chhung hian mitir lian zawng zawng chu World Bank kawng siam mek (Zotlang to Khankawn)-ah kal rih tura hriattir an ni a. Motor te tan tlai dar 6 atanga zing dar 9 thleng kaltlang phal a ni ang.

Kanan leimin lai sam hna enpuitu committee dinah hian SE, PHED chu Member Secretary a ni a. Member-ah SP Champhai, SE P&ED, EE PWD, Project Director, DRDA leh DIPRO te an tel a ni.