Vawiin khan Champhai DC Pu Vanlalngaihsaka chuan Champhai khawchhunga Primary leh Middle School zirtirtute tan naupangte humhimna tura hmalakna "Integrated Child Protection Scheme" zirchianna, District Child Protection Unit buatsaih chu a hawng. He training, I&PR Auditorium-a neih hi Champhai Circle chhunga School tin atanga Nodal Teacher a ruat te tan a bika buatsaih niin, ICPS bakah Juvenile Justice Act te, Prevention of Children from Sexual Offences (POCSO) Act leh Nodal Teacher-te mawhphurhna te zirho a ni.

Champhai DC chuan Sorkar hnathawk hlawm khat a lak hian zirtirtute tluk a mipuiin an rinna an nghahna an awm kherlo ang tiin, naupangte nun kaihruai kawnga an mawhphurhna chu ropui a tih thu a sawi a. Khawvel thang zelah suahsualna pawh a pung tel ve zel a, media lama changkanna in kan nun kawng engkimah min khawih a; mobile phone leh computer-te hmangin awlsam taka kan hriat leh en duh zawng te kan haichhuah theih rual hian a thalo lam pawh haichhuah a awlsam tih hria a, naupang enkawltute ngat phei chuan kan fimkhur lehzual a pawimawh a ni, DC Pu Lalngaihsaka chuan a ti a ni.

Vawiin training hi Pi R. Lalrinchhani, DCPO chuan kaihruaiin, ICPS leh Juvenile Justice Act, 2000 bakah Nodal Teacher-te mawhphurhna hrang hrangah zirtirna a pe a. Thilsual titute ngaihdam kan duhna thinlung hi a hlut viau rualin, kan ngaihdam vanga an sual tih an sim phah dawn chuanglo a, midang laka pawi an khawih belh zel ai chuan thuneitute hnenah report thlen hi kan tih ngei ngei tur a ni, a ti. Pi Lalsiammawii, LPO chuan POCSO Act chungchang zirtirna pe in, hriatloh vangin Dan hmaah thiam chang tumah kan awmloh avangin kan Dan hi kan hriat ve a pawimawh a ni, a ti bawk. Vawiin hunah hian zawhna leh chhanna hun hlawkthlak tan hman a ni bawk.