788/2022-2023
Champhai, the 6th June, 2022: Champhai Zotlang leh New Champhai huamchhung paltlanga Champhai-Zokhawthar World Bank Road siam, National Highway (NH) 6 a lirthei veivakte leh mipuite an him zawk nan tukin khan District Bawrhsap Pu James Lalrinchhana hovin inrawnkhawmna leh endikna neih a ni a. World Bank Road National Highway 6 ah fimkhur tawkloh leh dan zawm loh avanga accident a thlen fo avangte leh, nunna hial chan an awm thin avangin rui chunga lirthei khalh, tlan chak lutuk leh intlansiak khap tlat a nih thu tarlan a ni a, dan zawm lova tilui man an awm chuan an chungah ngaihhnathiamna awm lovin dan anga na taka hremna lekkawh zel nise tih a ni.

Inrawnkhawmna hun Zotlang YMA Hall-a neih hi Zotlang VCP Pu Lalbiakchhunga chuan a kaihhruai a, Champhai Zotlang khawchhung leh New Champhai Area-a lirthei tlanchak tur ven nana speed breaker dah chungchang leh Champhai-Zokhawthar World Bank Road National Highway 6 kentel hmalaknate inpawhtlang taka sawiho a ni a. He hunah hian Bawrhsap Pu James Lalrinchhana, SP Pu Lalrinpuia Varte, Addl. DC Pu Henry C.Lalrawnkima, Addl. SP Pu C.Lalengliana, SDO Sadar Pu Lalnunfela Chawngthu, PIU PWD Sr. AE Pu Hmingthanmawia, General Reserve Engineer Force (GREF) hotute, Traffic lam hotute bakah Zotlang leh New Champhai khawtlang hruaitute an tel a ni.

District Bawrhsap Pu James Lalrinchhana chuan khawtlang leh zin veivakte tana tha tur ngaihtuah tuma inrawnkhawmna buatsaih a nih thu sawiin, lirthei tlan chak tur ven nan ti a National Highway-a speed breaker dahte chu mipuite hum tura duan ni mahse, a nihna ang tur ni lova siam a nih chuan lirthei khalhtute tan harsatna a thlen thei a, mipui himna dah pawimawh hmasa ber chungin khawtual mite nen ngaihtuah hova siamrem dan dap tlan a tul a ni, a ti.

Indian Roads Congress inkaihhruaina duan angin mipui himna ngaihtuah chunga speed breaker siamrem dante enho chu ngaihpawimawha dah a nih thu sawiin, mipui chenna leh hmun pawimawh puipunna hnaivaiahte speed breaker dah bo ngawr ngawr ni lovin, Indian Road Congress inkaihhruaina zulzuia kawnga lirthei tlante tana him tur ngaihtuah tel chunga hmalak a tul thu a sawi a. Office chhawphnaia inrawnkhawmna huapzau tak neih a ni chuan rah tha a chhuah ngei a beisei thu a sawi bawk.

Champhai SP Pu Lalrinpuia Varte chuan mipui chenna hmun paltlang National Highway kawngpuiahte mipuite him zawk nan ngaihhnathiamna a awm thu sawiin, mipuite him nana tih speed breaker-te mumal lo taka siam a nih chuan accident a thlen thei a, fimkhur takin dan zawm chunga siam thin a ngai a ni, a ti a. Inkaihhruainate zawm chunga siam a tul thu leh langsar taka hmuh mai theiha siam a ngaih thu a sawi bawk.

He hunah hian lirthei khalhtute leh mipuite himna atan awlsam taka hriatthiam theih tur road sign hrang hrangte dah belh bakah a awmsate thawmthat dan turte sawiho a ni a. Indian Roads Congress duhdan anga speed breaker san zawng leh hlai zawng bitukte zirho niin, a tul anga speed breaker leh road sign chungchangte zirchianga hma la turin Addl. DC kaihhruai team din nghal a ni bawk.

Sawihona leh enfiahna atang hian hmalak dan turte ngaihtuahho a ni a, speed breaker leh road sign hrang hrangte, Zotlang kawna Traffic Island siamna turte leh kawngsir tuiluankawrte enfiah a ni a. Geology & Mining Champhai Site Office & Check Gate-a lirthei check tur intlar dan mumal zawk siam dan turte enho a ni a. Hemi hnu hian District Bawrhsarh, SP leh official dangte hian Chalbawia Junction Police Check Gate, Khankawn an tlawh a, hmalak tulte leh mamawhte an enho a ni.