Govt. Champhai Primary School I kum 100 tlin lawmna neih a niin he lawmna hun hi Champhai North Bialtu MLA Pu TT Zothansanga’n a hmanpui.

Kum 100 tlin lawmna hun Pu C. Laltanpuia (Teacher) kaihhruaiah hian Pu TT Zothansanga chuan Champhaia zirna In hmasa hian Mizoram mai nilo India ram tan pawha mi hlawhtling tak a chherchhuah tawh thu leh amah ngei pawh zirlai a lo nih tawhna school in kum 100 a tlin lawmna a hmang thei chu lawmawm a tih thu a sawi.

Thiamna lamah khawvelin chak taka hma a sawn vangin zirlaite tan thiamna tak tak neih a tul thu leh hlawhtlinna nei tur chuan taimakna leh tumruhna neih a pawimawh thu sawiin, kum 100 kalta a he school dintute leh hnathawktute thahnem ngaihna leh inpekna chu lawmawm a tih thu a tarlang bawk.

MHIP Hqrs. President Pi B. Sangkhumi, he huna Khual zahawm, he school zirchhuak pawhin thu sawiin, he school a zirlai hunte a sawichhuak a, he school dintute leh school a lo thawk tawhte zawng zawng hnenah hian kan lawmthu sawi ve nan eng thil tha in emaw i entir ve ang u, tiin kum 100 a lo tling ta chu lawmawm a tih thu a sawi a, School Centenary Souvenir a tlangzarh bawk a ni.

Kum 100 tlin lawmna ah hian he school a lo thawk tawh zirtirtu boraltate sunna hun hman a niin, kum 100 tlin lawmna hun hlimawm tak hman anih bakah ruai buatsaih a ni bawk.