981/2025-2026

Champhai, dated 27th June 2025: Vawiin khan District Research Officer's Office, Economics & Statistics, Champhai buatsaihin Champhai Higher Secondary School-ah 19th National Statistics Day hman a ni a, Champhai Higher Secondary School Principal Pu Lalnunmawia chu khuallian a ni.

He hun hi Pu H Lalhmangaiha, District Research Officer, Economics & Statistics, Champhai chuan a kaihruai a, khuallian Pu Lalnunmawia chuan thu sawiin, 19th National Statistics Day hman a ni chu lawmawm a ti a, Statistics tello chuan kan ramin hma a sawn thei dawn lo a, Economics subject la tan chauh a nilo a, eng subject pawh la ila Statistics hi kan hriatchian chuan kan ram in hma a sawn dawn a ni a ti a, statistics chungchanga an hriatna tihpun leh an hman tangkai theih nan he hun hi hmang tangkai turin zirlai kalkhawmte chu a chah bawk a ni.

A sawi zelnaah National Statistics Day lawmna hian awmzia a nei thin hle tiin, Zirlai kalkhawmte chu statistics zir turin a fuih a, nitin thil hrang hrangah chutiang bawk chu hmang tangkai turin a fuih bawk. He lawmna hi statistician lar Prof. P.C. Mahalanobis piancham a ni a, he ni hian mimal tinte chu ram policy siam leh tarlanna atana pui turin statistics hman theih dan tur zir leh hrethiam turin a fuih a ni.

19th National Statistics Day ah hian Pi Lallianpuii chuan Thupui ' 75 Years of National Sample Survey ' hmangin zirlai kalkhawmte hnenah Paper presentation hmangin hrilhfiahna leh sawi zauna hun a hmang a, hemi hnu hian Pi JH Lalramchhani'n lawmthu sawina neiin hun hi khar a ni.

National Statistics Day hi June 29 hian ram pumah hman a ni thin a, kuminah June ni 29 hi Pathianni a nih avangin vawiin khan champhaiah chuan hman a ni. He ni hi khawvel huapa statistician lar Prasanta Chandra Mahalanobis piancham puala hman a ni a, a thawhhlawkzia hlu tak avangin India rama National Statistical System pawh din a ni.