1522/2025-2026

Champhai, dated 19th September 2025: Ni 3 awh Adi Karmayogi Abhiyan, District Process Lab training, Champhai Circuit House Conference Hall-ah neih mek chu vawiin tlai dar 3:30pm khan Pu James Lalnithanga Additional DC Champhai chuan kharna hun a hmanpui.

Khuallian Pu James Lalnithanga chuan tribal te hmasawnna tura a te ber atanga a lian ber thlenga hruaitu tha, hmalatu tur zirtirna pek hna leh zirtir chhawng tura Block trainer ten tha taka an hlen chhuak chu a lawmawm a tih thu a sawi a. Block level-a an thawh hunah pawh theih tawp chhuah turin a fuih a ni.

Training neih zawh taka District Master Trainer te'n Block Master Trainer zirtir an pek te hian an block-ah hetiang training hi an buatsaih ve dawn a ni. Block Master Trainer hi Champhai RD Block leh Khawbung RD Block atangin mi 6 theuh an kal a ni. SDO (Sadar) Pu Chandrakant Bagoria chuan lawmthu sawinain training hi a khar a ni.

Nimin tlai dar 4 khan khan Ministry of Tribal Affairs atanga Observer, Section Officer ni bawk Pu Vinod Kumar chuan a hmunah a tlawhin India ram, ram intodelh "Developed Country" Vikshit Bharat ni tura hma lak chhoh mekah ram pum huapa hmasawnna kawng hrang hrang, a bulthum atanga chawi kang chho tura beihpui thlakna Adi Karmayogi Abhiyan hlawhtling taka kalpui a nih theihna atan District Trainer-te leh Block Master Trainer-te chu theih tawp chhuah turin a ngen a ni.

Adi Karmayogi Abhiyan hi Village Council leh Block level-a inrelbawlna tha zawk a awm theih nana duan a ni a, tribal a tinzawn bik a ni. Ministry of Tribal Affairs hmalakna a ni a, rorelna tha zawk kalpui dan tur inzirtir a ni ang a, khawtlang hruaitute leh mipuite nen thawhhona tha siam tum bawk a ni.