No.993/2021-2022

Dated Champhai, the 16th June, 2021: Vawiin khan Champhai District Level Coordination Committee on African Swine Fever (ASF) and other Trans-boundary Animal Diseases (TADs) chu Chairman Pi Maria C.T. Zuali, Bawrhsap hovin DC Conference Hall-ah an thukhawm.

He hunah hian May ni 11, 2021 a Champhai District Zokhawthar khuaa Vawk natna hri hlauhawm tak African Swine Fever hmuh chhuah a nih hnua hmalak dan hrang hrangte thlirho niin, District Magistrate-in April ni 16, 2021 a vawk lakluh leh phurhchhuah chungchanga khapna thupek a chhuah vawiin June ni 16, 2021 a tawp tawh tur siamthata pawhsei dan tur chungchangte sawiho a ni.

Pi Maria C.T. Zuali chuan Indo-Myanmar ramri hrula awm Champhai District-ah ramri kaltlanga ran lakluh leh natna inkaichhawn tur ven a pawimawh hle thu sawiin, tun thlenga ran hrileng darh tur tha taka khuahkhirh a ni thei chu lawmawm a tih thu a sawi a. Thahnemngai taka venhim hna thawktu zawng zawngte chhungah lawmthu a sawi a ni.

Dr. B.Zonghinga, DVO Champhai & Member Secretary, District Level Coordination Committee on African Swine Fever hnen atangin Champhai District dinhmun tlangpui ngaihthlak a ni a. African Swine Fever lenna infected area a puan Zokhawthar tih loh chu khaw dangte an him vek rih thu leh, Champhai District Zokhawthar khuaah vawiin thlengin Vawk 223 an thih tling tawh thu a sawi bawk. 

Meeting chuan Champhai District chhunga tun thlenga thawhhona tha tak avanga Vawk hrileng thleng lova khuahkhirh a ni chu lawmawm tiin, theihtawp chhuaha tan tlan zel nise a ti a. Vawk vulhtute hmakhua ngaiin Champhai District chhunga tualchhung vawk leh vawk note thar chhuah thahnem tak awm chu District chhung khaw danga phurhchhuaha zawrh a nih theih dan turte sawiho a nih hnuah ruahmanna siam a ni a. Vawk hrisel leh dam tha chauh hralh chhuaha lei a nih ngei theihna turin ruahmanna siama bawhzui nise tih a ni a. African Swine Fever hrilenna hmuna puan Zokhawthar leh Myanmar atanga Vawk lakluh tur danbeh zel erawh khauh taka kenkawh chhunzawm nise tih a ni bawk.

Meeting thurel bawhzuiin Champhai District Magistrate Pi Maria C.T Zuali chuan Sec. 144 CrPC, 1973 (Act II of 1973) in thuneihna a pek angin vawiin chawhnu khan African Swine Fever laka Champhai District a him  theihna turin thla hnih chhung awh tur thupek thar hetiang hian a chhuah:

1. Champhai District chhungah Myanmar atang leh State dang atanga Vawk, vawksa leh vawksa atanga sian reng reng lakluh phal a ni lo.

2. Champhai District chhungah District dang atanga Vawk lakluh leh District danga phurh
chhuah khap tlat a ni.

3. ASF len mekna Zokhawthar khua atangin Vawk lakluh leh thawnchhuah phal a ni lo.

4. Vawk vulhtute harsatna sukiang turin Champhai District chhunga khua/veng pakhat atanga khua/veng danga vawk lakluh leh thawnchhuah chu June, 2021 chhung atan phal a ni. A.H. &Vety. Department, VC, YMA leh VLTF-te hriatpuinain ruahmanna siam tur a ni a, hei hian ASF len mekna infected area Zokhawthar khua a huam lo ang.

5. Vawk thi a awmin paih mai lovin thuk taka phum zel tur a ni.

6. Vawk damlo hralh leh talh khap tlat a ni.

Thupek zawm lo te chu IPC Sec. 188 hmanga hrem an ni ang.

A.H & Vety. Department Champhai tarlan danin tun dinhmunah Champhai District chhungah vawk 12,414 vel a awm mek a.   March, 2019 atanga vawiin ni thlengin dan lova vawk phurh man 122 awm tawhin, 19 te Myanmar lama thawnkir leh an ni a.
Porcine Reproductive and Respiratory Syndrome (PRRS) hrikai 63 leh Classical Swine Fever (CSF) hrikai 4 te hmuh chhuah niin, 61 te chu dan anga tihhlum hnuah phumbo an ni a, 27 te chhan dang vangin an thi bawk a, 15 te lilam an ni.