320/2022-2023 

Champhai, the 27th April, 2022: Vawiin chawhnu dar 3 khan Champhai Bawrhsap Pu James Lalrinchhana hovin Champhai District Level Committee on African Swine Fever & other Transboundary Animal Diseases (TADs) chu DC Conference Hall-ah an thukhawm a.  African Swine Fever leh ran natna ramri kaltlanga inkaidarh theih hrang hrangte ven dan chunchang ngaihtuah a ni.

Pu James Lalrinchhana chuan African Swine Fever hrilengin nunphung leh khawsak nasa taka a nghawng thu sawiin, hrileng vanga vawk chan leh harsatna tawkte a tawrhpui takzet thu leh theihtawp chhuaha hmalak mek zel a nih thu a sawi a. Hrileng zel tur ven nan ram dang leh state dang atanga vawk, vawksa leh vawksa atanga siam Champhai District-a  lakluh phal loh mai bakah, Champhai District chhung eng khuaah mah lakluh leh phurhchhuah pawh phalloh chhunzawm zel a ni, a ti a. Vawk hrileng ven kawnga Assam Rifles, Police, A.H & Vety Department, khawtlang hruaitute leh pawl hrang hrangte hmalakna fakawm tiin, hrileng zual zel tur ven nan tun aia nasa zawka tha thawh nasa lehzual turin a chah a ni.

District Bawrhsap chuan tawrhna nasa zawk a thlen loh nan district mipuite chu tanhopuiah sawmin, dan lova thiltih leh hrileng tipunlun thei zawnga chetlaknate do tlat tur leh a tul pawha thuneitute hrilhhriat hreh lo turin a chah a. Mamawh leh hriat duh an neihte inthlahrung hauh lovin thuneitute leh department lam hotute hnena thlen vat zel thin turin a chah nghal bawk a ni.

Dr. B.Lallawmsanga, DAH&VO & Member Secretary, District Level Coordination Committee on African Swine Fever chuan ASF chungchanga District dinhmun tlangpui  tarlangin Department hmalakna leh hmachhawpte a sawifiah a. ASF chu virus hrikin a thlen, a vei tawhte thihpui ngei ngei, enkawlna bik leh hridanna vaccine la awm lo a nih thu a sawi a. Mihring leh lirthei veivahna bakah ran leh a sa phurhkual avanga darh thar leh a nih a rinawm thu a sawi bawk.

Dr. Lalhmangaiha, Sr. Vety Officer, District Vety. Hospital Champhaiin invenna kawnga hmalak tulte a sawifiah a. Tarlan dan chuan Bleaching Solution 2%/Sodium Hypochlorite 2% hmangin vawk in leh a chhehvel kar khatah vawi 3 tih fai/sil tur a ni a.  Vawk damlo a awmin dahhran vat tur a ni a, vawk damlo leh hrisel thalo khawih pawlh loh tur niin, a theih hram chuan a enkawltu pawh a hran a awm tur a ni. Vawk chaw pekna hmanrua, thleng, fian leh adangte uluk taka silfai thin tur a ni a, chaw pekna hmanrua intawm tir loh tur a ni. Hriatchian loh chawnawi lak loh tur a ni a, mi vawk ina kalloh tur a ni a. Vawksa silna, chaw ningnawi vawk in hnaihah paih loh tur a ni a,  vawk in/farm-ah ran dang luh tir loh hram tur a ni.

Dr. Lalrinhlui, VO, District Vety. Hospital Champhai hnen atangin vawk thi sawngbawl kawnga zawm turte ngaihthlak a ni a. Vawk thi te chinai tui nen feet 6 tala thuka phum te, vawk thi phurhkual leh khawih pawlh a him loh thu leh a thihna hmun hnaivaiah emaw, phumna tur hmun bik chauha phum a him thu a sawi bawk.

He hunah hian African Swine Fever chungchang inzirtirna zau zawka neih dan turte sawiho niin, hriattur tul hrang hrangte media leh digital leaflet hmanga puanzar nise tih a ni a. YMA Branch hrang hrang, VC leh mipuite, a bik takin ramri hrula chengte hnenah inzirtirna zau thei ang ber neih a, ASF hrileng dona kawnga hmalaknate tha taka tawiawm tura ngenna leh hriattirna siam nise tih a ni a. Veng/khua anga vawk thi phumna remchang lo te an awm chuan a tul anga hmalak nise tih niin, laboratory result nghah chhunga hrileng a darh loh nana hmalak dan tulte sawiho a ni bawk a.  District Magistrate thupek chhuah, District pawn atanga Vawk, vawksa leh vawksa atanga thil siam lakluh leh, District chhung khua leh khua inkara vawk phurhkual phallohna dan chu khawng lehzuala kenkawh a nih theih nan hmalak ni se, heng bakah hian himna tura thupek chhuah zawmlo manchhuahte chungah dan angin na taka hremna lekkawh zel nise tih a ni bawk a. Tanrualna leh thuawihna tel lo chuan ASF hrileng do hneh a harsat thute tarlan a ni bawk.

DAH&VO Dr. B.Lallawmsanga tarlan dan chuan ASF hrileng thawhkhatna chu kum 2021 May ni 9 khan Champhai District-ah Zokhawthar khua atanga hmuhchhuah a ni a. Vawk 548 in thihpuiin October 2021 khan ASF vanga vawk thi hnuhnung ber report a ni. ASF thawhhnihna chu kumin February ni 4, 2022 khan Champhai Electric Veng atanga report a ni a, March ni 21, 2022 khan NDDRL Bhopal chuan a finfiah a. Tun thlengin khua leh veng 17 te nghawng mekin khua/veng 11 te ASF hrilenna hmun 'Infected Area' ah puan a ni tawh a. Veng/khua 6 dangte atanga sample lak result nghah mek niin, result azira hrilenna hmuna puan theih reng an ni.

Vawiin April ni 27, 2022 thlenga ASF leh ASF ni ngeia rin avanga vawk thi zat chu 614 niin, vawk 100 te fimkhur thuhlaah suat an ni a. A vaia vawk thi leh suat zat chu 714 a tling tawh a ni.

ASF rinhlelh vawk thi report a awmin Rapid Response Team te tirh vat zel niin, Rapid Antigen Test hmanga enfiah thin a ni a,  finfiahna chiang zawk ngaichang turin sample te lak niin hmunpui lama Laboratory changtlung zawkah RT-PCR khawla endik tura thawn thin a ni a, Laboratory atanga result dawn azirin infected area puan thin a ni. Kum 2021-2022 chhung hian awareness campaign tum 80 chuang huaihawt a ni a, a theih chen chenah 2% bleaching solution, 2% Sodium hypochlorite solution-te sem chhuah thin a ni bawk.