2078/2022-2023
Champhai, the 27th September, 2022: Mizoram Sawrkar hmalakna kaltlanga Agnipath Scheme Army Recruitment Rally hnuaia Sipai tan tumte puala inpuahchahna leh kawng inkawhhmuhna, Pre-Rally Training Program, Champhai Zotlang Stadium-a neih chu tukin dar 7:30 khan khar a ni. Kharna hun tawi buatsaih hi District Bawrhsap Pu James Lalrinchhana chuan hmanpuiin sipai tan tumte fuihna thu a sawi.

District Bawrhsap Pu James Lalrinchhana chuan sipai tan tumte tana pre-rally training hlawhtling taka huaihawt a nih theih nana department hrang hrang, NGO leh VC te theihna lungrual taka luangkhawma hmalak a ni chu lawmawm tiin hmuh nuam a tih thu a sawi a. Agnipath scheme hnuaia tlingten armed forces zawmin agniveer tia vuah an nih dawn thu leh an paltlang ngai hrang hrangte tarlangin, thiamna hrang hrang bakah zirna sang zawk zawh thei tura hun tha siam sak an nih dawn thu a sawi a. Defence Training Institute tha tak takahte training an neih dawn thute, hlawh mai bakah hamthatna dangte siam sak an nih dawn thute a tarlang a. Hnaruak awm 25,000 ah diltu mi nuai 3 leh tlem an awm tawh thu sawiin, kalkhawmte chu mahni inrintawkna leh huaisenna nei turin a chah a ni.

Pu James Lalrinchhana chuan inpuahchahna neih dan hrang hrangte tarlangin, a tha leh entawntlak lam thil buaipuitu thalai thahnem tak a hmu chu lawmawm a tih thu a sawi a. Kalkhawmte chu tun atanga agniveer sipai rilru pua ataka puitlin tura theihtawp chhuah turin a fuih a. Hnam dang zingah mizo hnam leh kristian nun zemawi tak vawnnun tum tur leh tawng leh thiamna dangte zir tum turin a fuih bawk a. Ram tihmingthatu, zuk leh hmuam laka fihlim, mahni inthununna tha neia awhna sual laka fihlim turte, rilru fim leh huaisen Champhai District tihmingthatu nih tum turtein a fuih a. Tun tumah tling rih lo an awm pawhin hnual mai lova theihtawp chhuah chhunzawm tum turin a chah bawk a. An lakah beiseina sang tak neih a nih thu leh agnipath scheme army recruitment rally-a tlingte tan a tul ang zela inkaihhruaina, post-rally training-te thlenga neihpui leh tura ngaihtuahna sen a nih thu sawiin, chumi huna inhmu leh vek thei tura fuihna leh chona siamin duhsakna a hlan a ni.

Champhai SP Pu Lalrinpuia Varte chuan Agnipath scheme hnuaia sipai, agniveer nih tumte chhuanawm a tih thu a sawi a. Sawrkar laipui hnuaia hna awmahte mizo thalai tam zawk an luh theih nana tanlak a tul thu sawiin, ngaihpawimawh ngai a nih ang ngeia tha taka kaihruaitute thahnemngaihna fakawm a tih thu a sawi a. Department hrang hrang, YMA leh khawtlang hruaitute thlawpnaah lawmthu a sawi a. Sipai tan tumte chu an kal hma ngeia lehkha pawimawh thiltel ngaite enfiah hmasa turin a chah a, Champhai District tana theihtawp chhuah turin a chah nghal bawk.

Pre-Rally Training Program chungchang report petu SI M.Hunter Hnamte chuan training chhungin hmasawnna lang thama hmuh a nih thu leh, mumal takin taksa tana harsatna awmlo tur anga training pek thin an nih thu a sawi a. Thalai rualte inpekna fakawm tiin, taksa insawizawi mai bakah an kalzelna tur kawnga tul angte hrilhhriat thin an nih thu a tarlang bawk.

Thusawitu dang Pu Lalzahawma Varte, Asst. Secretary, Sub-Hqrs. YMA Champhai chuan Sawrkar hmalaknaa Champhai District thalai sipai intlar turte tana pre-rally training program buatsaih a ni chu vanneihthlak a tih thu a sawi a. Mihring insiamthatna leh puitlin kawnga tanlakna a nih avangin a tum tak tihlawhtling thei tura theihtawp chhuah turin kalkhawmte a fuih a ni.

Agnipath Scheme Army Recruitment Pre-Rally Training Program hi September ni 19, 2022 atang khan neih tan niin, sipai tan tum mi 174 te an inziaklut a. Nitin zing leh tlaiah training neihpui thin an ni a, instructor 3; SI M.Hunter Hnamte, ASI Ajay Rai leh Constable Lalramhluna ten training an neihpui thin a ni.

He hun hi Addl. SP Pu C.Lalengliana chuan kaihruaiin training-te aiawhin Tv. Lawmsangkima, Champhai Vengsang chuan lawmthu a sawi a. District Sainik Welfare & Resettlement Office kaltlangin sipai tan tumte tana lehkha pawimawh thiltel ngai leh tul dangte inhrilhhriatna hun neih a ni bawk.

Tukin hun hmannaah hian Sawrkar Official-te bakah Sub-Hqrs.YMA Champhai leh Champhai Zotlang khawtlang hruaitute an tel a ni.