No.3418/2020-2020

Vawiin khan Champhai Bawrhsap  Pi Maria C.T Zuali hovin Agriculture & Allied Sector  department hrang hrangte kaltlanga chak lehzuala hmalak theih dan turte, line department-te inkara thawhhoa tha zawk a awm theih dan turte  DC Conference Hall-ah sawiho a ni.

Bawrhsap chuan kuthnathawka eizawng leh loneitute tana thawktu Department hrang hranga  hotulute  chu mipui tana rawngbawl an ni tih inhria a, khaichhuak thei tura theihtawp chhuah turin a chah a. An hriat a tana tulte zirtir leh kawhhmuh kawngah tun aia nasa zawka tan la sauh sauh turin a fuih  a ni.  Line department hrang hrangte mahni duh dan anga kal mai lova thawhho a ngaihna laiah inrawntlanga tha thlah lova tangho zel turin a chah a ni.

He hunah hian line department  hrang hrang hotute hnen atangin Central Scheme leh State sawrkar kaltlanga loneitute tana hmalak tawhna leh hmachhawpte ngaihthlak a ni a. Chak zawka hmalak  theih dan turte bakah hlawk zawka thar leh a hralhna tur thlenga ngaihtuahho a ni a. Line department-te inkawp rem taka kaltlan theihna laite zirchian niin, loneitute hmakhua ngaiin an dinhmun chawikan leh dawmkan ngaihna laiah theihtawp chhuaha intawiawm tawn zel nise tih a ni.

Meeting-ah hian Bawrhsap Pi Maria C.T Zuali, Pu R.Lalnghakliana, PD DRDA, Pu Mark Lalthanliana Addl DC,  Pu Lalduhthlana DFO, Pu George Lalthanngura DAO, Dr. B.Zonghinga DVO, Dr. Lallawmkima DIPRO, Pu Laldingliana Hrahsel EE, I & WRD,  Pu Vanlalvuana Rokhum SDHO, Pi Hmingthantluangi DSO, Pu Vanlalchhuana DO (Soil), Pu Lalhmunsanga DFDO, Pu K.Zonunsanga HEO leh Official dangte an tel a ni.