No.1728/2020-2021

Dated Champhai, the 7th June, 2020 (Sunday): Vawiin chawhnu dar 3 khan Champhai DC Conference Hall-ah Bawrhsap thar Pi Maria C.T Zuali hovin Champhai District Covid Nodal Officer hrang hrang te'n meeting an nei a. Covid-19 vei awm thulh pawha khunghrana enkawlna tur  Designated Covid Health Centre (DCHC)  changtlung zawk siam dan turte chipchiar taka sawi hovin ruahmanna thar siam a ni.

Thukhawm chuan Covid-19 vei damlo finfiah an awm thulh pawha khunghrana enkawlna tur Designated Covid Health Centre (DCHC) atana lo ruahman tawh Surgical Block, District Hospital Champhai chu damloh nikhuaa Damdawiin pantu mipuite tana remchang leh him zawkna turin Nursing School Building chung ber, tuna Covid Care Centre a hman mek chungah sawn mai nise a ti a. A enkawl leh vil chungchang pawh District Hospital Champhai lamin a lo ruahman anga kalpui nise tih a ni a. Heng bakah hian damlo phurhkual dan tur leh enkawl dan turte,  venhimna chungchangte, ei leh in pek dan turte, hnawm senghawi dan turte, Quarantine Centre a awm te thil dang vanga damloh palh thulh pawha enkawlna tur hmun ngaihtuah leh tul dangte chipchiar taka sawiho a ni.

He hunah hian Pu Lalnunfela Chawngthu, SDO Sadar hnen atangin district inpuahchahna leh dinhmunte  ngaihthlak a ni a. Dr.J.Lalramchhuanga, Senior Specialist, Leader, Covid-19 Treatment Team, District Hospital Champhai chuan Covid-19 vei damlo enkawl kawnga  ruahmanna an neih dante sawifiahin, Doctor thiam kaihhruaina hnuaiah  Covid-19 Treatment Team pali  siam anih thu leh inkaihhruaina leh tul angte inhrilhriatna a tul ang zela neih anih  thu a sawi bawk.

He hunah hian Champhai SP Pu Rex Zarzoliana, Addl DC Pu Mark Lalthanliana, CMO Dr.R.Lianmawia, DMS Dr. Zatluanga, District Nodal Officer hrang hrang leh Medical Team Member-te an tel a ni.