No.1189/2020-2020

Dated Champhai, the 18th May, 2020: Vawiin chawhnu khan Champhai Bawrhsap Pu Mark Lalthanliana, District Official dangte leh Champhai khawpui huamchhunga Kohhran lian leh hmunhma nei tha zual, Presbyterian Church of India (PCI) bialtu Pastor-te chuan State dang atanga lo hawte khunghran buaipui kawngah inrawnkhawmna an nei.

Bawrhsap Pu Mark Lalthanliana chuan Covid-19 hripui leng mek avanga State danga tangkhangte lo haw runpui kalpui chhoh mekah hnunhma neih ten lo haw turte dahhranna tur a dawl zawh meuh rih loh avangin Kohhranho te puihna leh tawiawmna an ngen thu a sawi a. Champhai district atanga haw tur in report mi 700 chuang an awm mek thu leh Sawrkar siam Quarantine Facilities a leng bakah kohhranin a tawiawma mi 300 vel khunghranna an neih theih dawn chuan awlsamna a siam hle dawn a ni, a ti a. Quarantine Facilities a zawm tur leh kalpui dan tlangpui pawh sawiin, lut turte chu thisen test Rapid Antibody Testing (RAT) tihsaka hima ngaih chinte chauh dahluh thin an ni, a ti a. Lo haw turte an lo thlen rual dawn loh avangin rualkhai taka Quarantine Centre kalpui tura ngaihtuahna sen ho angaih thu leh tumah inthliarna awm lova quarantine kalpui a tul thu a sawi a. Ngenna siamte Kohhran Committee in ngunthluk taka lo ngaihtuaha, remchan loh pawha inthlahrung lo tur leh harsatnate thuneitute hnena thlen hreh lo turin a ngen a. Lo haw te a theih chinah Sawrkar ruahman Quarantine Facilities ah te dahluh zel an nih dawn thu sawiin, Kohhran a inhuama engemawzat a lo buaipui theih chuan zangkhaina siamin a lawmawm hle dawn a ni, a ti a. Community Quarantine Centre siam kawngah Kohhran leh veng chhung mi te himna ngaipawimawha, harsatna thlen lo turin inkaihhruaina dan mumal tak siam anih dawn thu a sawi bawk.

Pu Lalnunfela Chawngthu, SDO Sadar chuan tangkhang lo hawte a tahtawla Quarantine Facilities neih dan mila lakluh thin chu haw duh an tamin an hmanhmawh hlawm tawh avangin an awmna tur ngaihtuah a lo ngai a, Kohhranho te puihna leh tawiawmna chawpchilh taka ngen a lo ngai ta a ni, a ti a. Tunkar Nilaini thleng hian lo haw tur list leh an awmna turte kimchang taka thehluh a tul tawh avanga hmalak hmanhmawh ngai anih thu a sawi bawk.

Kohhran hruaitute chuan Sawrkar atanga tanpui leh tawiawm tura ngenna chu tlanchhiatsan thu a awm lo a ni tiin, DC Office atanga dilna lehkha siam chu Kohhran Committee kova a ranglama bawhzui an tum thu an sawi a. Kohhrante dinhmun a rualkhai loh avangin inkaihhruaina mumal leh khairual tak DC Office lamin bithliah nise ti a an ngenna chu siama Committee zawh veleh hlan an ni a, hemi zulzui hian Kohhran Committee thukhawmin Kohhran Hall/ Sunday School Hall a Quarantine Centre siam leh siam loh thutlukna an nei dawn a ni. He hunah hian Security chungchang te pawh sawiho a ni a, Pastor te'n an bial chhung Kohhran dinhmun report pein, bial chhunga Quarantine Facilities neih theih leh theih lohna Kohhrante an tarlang a. Thukhawm chuan Kohhran te an inhuam chuan report kimchang DC Office ah thlen se, DC Office in final report lo buaipui se a ti bawk.

Vawiin Meeting-ah hian Bawrhsap Pu Mark Lalthanliana, SDO Sadar Pu Lalnunfela Chawngthu, DIPRO Dr. Lallawmkima, DIET Principal & Procurement Nodal Officer Pu RL Thianghlima, DPRC Quarantine Centre, Keifangtlang, Nodal Officer Pu Obed Lalmalsawma, SDC te bakah khawpui chhunga PCI bial vawng Pastor-te; Pu R.Vanlalruata (Vengthlang Pastor bial), Pu K.Lianmunga (Vengsang Pastor bial), Pu R.Lalthapuia (Kahrawt Pastor bial), Pu Lalchungnunga Hauhnar (Kanan Pastor bial), Pu F.Lalrinawma (Bethel Pastor bial), Pu H.Zalianchama (Ruantlang Pastor bial) leh Pu K.Lalchhuanawma (Zote Pastor bial) te an tel a ni.