1115/2025-2026

Champhai, dated 10th July 2025: District Election Office, Champhai bultumin vawiin khan National Training Booth Level Officer (BLO) te pualin Circuit House Conference Hall-ah buatsaih a ni a, Election Officer Pu Ngulzathuama'n training kaihruaiin BLO-te  Duties & Responsibility leh BLO Apps chungchang zirtir an ni.

Training hawngtu Project Director, DRDO leh ERO ni bawk, Pu James Lalnithanga chuan Training tura lokal khawm BLO-te lawmna thu a sawi a.  Electoral Roll chu inthlan buaipuina kawnga pawimawh hmasa ber a ni a, inthlan felfai leh dik nei turin Electoral Roll felfai tak neih a ngaih avangin hemi buaipuitu BLO te chu an pawimawh hle a ni tih a sawi. Electoral Roll siam thar lehna atan form hrang hrang te chu uluk leh fimkhur taka ziak thin tura chahin a hnarkaitu an nih hre thar leh turin a chah bawk a ni.  ECI ruahmannain thil thar a awm zel a, namnul mai lova zawm thei turin thawktute intuaithar zel a ngaih thu a sawi. BLO kalkhawmte chu training zalen tak, inpawhtlang leh hlawkthlak tak hmang turin duhsakna a hlan a ni.

Vawiin training hi thuanghniha kalpui niin chawhmaah 23-Champhai North A/C tan  Master Trainer Pi Lalruatpuii Hnamte, SO leh AERO ni bawkin Duties & Responsibilities for BLO chungchang zirtirna a pe a. Pu J. Lalthanmawia, Data Entry Operator-in BLO App awmzia leh hman dan zirtirna an pe. Chawhnuah 24-Champhai South A/C tan Master Trainer  Dr. Vanlalnunpuii Ralte, BDO leh AERO ni bawkin Duties & Responsibilities for BLO chungchang zirtirna a pe a, Pu J. Lalthanmawia, Data Entry Operator-in BLO Apps awmzia leh hman dan zirtirna a pe  bawk a ni. BLO Training hi July ni 11, 2025 ah 25-East Tuipui A/C huamchhunga BLO te tan Pi Lalchhandami Pachuau, BDO leh AERO ni bawk hovin Khawbungah neih leh tur a ni.