No.2526/2021-2022
Aizawl the 7th October, 2021: Mizoram Youth Commission (MYC), Sub-Hqrs. MHIP, Medhavi Foundation leh District Skill Committee tangkawp buatsaih MHIP member-te Cake ur inzirtirna training Circuit House Champhaia neih chu vawiin khan khar a ni a, kharna hun Circuit House Conference Hall-a hman hi Dr. Z.R Thiamsanga, MLA, Health & Family Welfare Board Vice Chairman chuan khuallian niin a hmanpui a ni.

Khuallian Dr. Z.R Thiamsanga chuan MYC kaltlanga Cake ur inzirtirna training Mizorama a hmasa ber Champhaia buatsaih a ni chu lawmawm a tih thu sawiin, hma la tu District thuneitute fakawm a tih thu a sawi a. Hripui leng avanga economic a tlak chhiat laia eizawnna tha tak, sum leh pai lak luh theihna tur Cake ur zir chhuak thei mi 24 an awm chu lawmawm a tih thu sawiin trainee-te chu eizawnna tluantlinga hmang ngei tura theihtawp chhuah chhunzawm turin a chah a ni.

He hun hi Pu Lalnunfela Chawngthu, SDO(Sadar) chuan a kaihhruai a. Pu David Lalruatfela, Medhavi Foundation chuan training neih dan report tawi a pe a. Trainee-te hnen atangin report ngaihthlak a ni bawk a. Dr. Lallawmkima DIPRO leh Sub Hqrs. MHIP President Pi Lalhlimthangi Khiangte ten an telpui a ni.

Cake ur training hi September ni 27 atanga tan niin MHIP member mi 24 te'n an zir chhuak a, Cake ur na hmanrua (Oven) MYC kaltlangin pek an nih dawn bakah training chhungin stipen nitin Rs 200/- an dawng a, Trainee-te hi Certificate leh Cake ur zirna lehkhabu pek vek an ni bawk.