2341/2025-2026

Champhai, dated 21st November 2025: November ni 20 leh ni 21 khan Thangtea Hall, Kahrawtah District Child Protection Unit leh District Programme Officer, Women and Child Development tangkawpin New Generation Movement (NeGMo) Programme on Career Awareness buatsaih a ni a, ni khatnaah hian CWC Chairperson Pi WC Zorammawii chu khuallian niin ni hnihnaah hian Champhai Bawrhsap Pu Mohammad Aaquib chu khuallian a ni.

Ni khatnaa khuallian Pi WC Zorammawii chuan hna tha tak nei tur chuan taimakna, tumruhna leh thuawihna a ngaih thu a sawi a, panelist te hnen atangin tam thei ang ber zir chhuak turin a chah.

Ni hnihnaa khuallian Mohammad Aaquib chuan zirlai naupangte chu taima taka lehkha zir a, zirna sang um zel turin a fuih a, hna eng atan pawn taimakna leh tumruhna a ngai tih sawiin mahni invawng tlat turin a fuih. Ruihhlo laka fihlim turin a fuih a, hriselna ngai pawimawhin taksa leh rilru hriselna vawng tha turin a chah bawk a ni. Khuallian te hian high school leh higher secondary school pual essay writing leh slogan writing competition lawmman an sem nghal bawk a ni.

Ni khatnaah hian panelist 4 - Champhai BDO Dr. Vanlalnunpuii Ralte, UD&PA atangin Pi Baby Lalremtluangi, Advocate Pu Lalchhuansanga Sailo leh GM HSS Teacher Pu Lalthantluanga Tochhawng te an ni a, ni hnihnaah hian panelist 4 - DIPRO Pu Lalzara, Commerce Asst. Professor, GCC Pu Ramnundanga, PHE SDO Pu C. Zothansanga leh SBI Lead District Manager Pu Lawmkima te an ni. Panelist te chuan thu sawiin an tawnhriat leh an duh zawng an sawi a, an department lam hnathawh te sawiin tlin theih dan te an sawi bawk.