2497/2025-2026

Champhai, dated 18th September 2025: Vawiin khan Thangtea Hall Kahrawt Vengah Champhai District-a All India Services Officer ten zirna in pasarih (7) atanga zirlai thlan chhuah te tan Career Guidance an nei a, zirna pawimawhzia sawiho a inkawmna hun an nei bawk a ni.

Pu Lalthlamuana SDEO, Champhai chuan hun a kaihruai a, Pi Lalsiamliani, District Education Officer chuan inhmel hriattirna leh inlawmna thusawiin Career Guidance leh Interaction programme Zirna in hrang hrang atanga zirlaite tana Champhai District-a All India Services Officer te nen a neih a nih lawmawm a ti hle a, zirlaiten an hlawkpui ngei a beisei thu a sawiin he hun hlawhtlin theihna tura tha thawhtute chungah lawmthu a sawi bawk a.

Vawiin Career Guidance leh Interaction programme ah hian Champhai Bawrhsap Pu Mohammad Aaquib (IAS), Champhai SP Pu Lokeshwaran R (IPS), SDO (Sadar) Pu Chandrakant Bagoria (IAS) leh SDPO Pu Vivek Maurya (IPS) te'n zirlai kalkhawm te an zirna kawnga an hmasawnna tur leh zirna sang zawk leh hlawhtlinna an neih theihna turin, an zirna zelah rahbi pawimawh tak tak an sawi a, lehkha zir tama pass tur chauh ni loa thiam tura zira sâng tak zir ni ngawt loa mi thiam rawn tlák, hna thawk thei, tum neia lekha zir, ram leh hnam tana chhawrtlak, midangte tanpui thei, Mizoram mai ni lo India ram kal chhuaka hnathawk thei tura huaisenna leh taimakna nen an kalna kawnga mi hlawhtling ni turin fuihna thu an sawi. Zirlai kalkhawm te kawmna neiin zawhna leh chhanna hun hlawk tak an hmang bawk a ni.

Career Guidance leh Interraction programme hi DC Champhai leh District Education Office buatsaih a ni a, zirna in pasarih (7) Govt GM HSS, Govt Champhai H/S, Vengsang H/S, Bethel H/S, Einstein HSS, BC Lalthlamuana English Academy leh Agape Academy te an tel a ni.