3564/2022-2023

Champhai, the 13th February, 2023: Vawiin chawhnu dar 1 khan Chapchar Kût, 2023 Champhaia lawm dan tur relin Champhai District Chapchar Kût Organizing Committee chu an Chairman Pu James Lalrinchhana, District Bawrhsap hovin DC Conference Hall-ah an thukhawm.

Bawrhsap Pu James Lalrinchhana chuan Mizote hnam ziarang lanna leh inzirtirna pawimawh tak, Kût ngaihhlut berte zing ami, Chapchar Kût lawmna chu hrileng avanga hun engemawchen a khaihlak hnuah hman a ni leh thei tur chu lawmawm a tih thu a sawi a. Chapchar Kût lawm a nih chhan hrang hrangte tarlangin, hlawhtling tak leh a nihna tur ang taka mipui huapzo thei ang bera Kût lawm a nih theih nan mawhphurhna nei zawng zawngte theihtawp chhuah theuh turin a chah a ni. 

Thukhawm chuan Mizo hnam tana Kût pawimawh tak, Chapchar Kût lawmna chu Champhaiah mipui huapzo leh ropui taka buatsaih nise a ti a. Sawrkar hun ruat March ni 3 chawhma dar 11 atangin Chapchar Kût lawmna Zotlang Sports Stadium, Champhaiah hman nise tih a ni a. Kût pa atan Law & Judicial Minister Pu T.J. Lalnuntluanga, Champhai South bialtu MLA chu sawm nise tih niin, District Bawrhsap Pu James Lalrinchhana chu Kût thlengtu atan ruat a ni bawk.

He hunah hian hlawhtling taka Kût hman a nih theih nan Sub-Commitee pawimawh hrang hrangte din niin, Line Department-te chanvo leh mawhphurhna hrang hrangte siam a ni a. Chapchar Kût lawmna kaltlang hian Zofate inpumkhatna leh hnam ziarang lam hawi a tam thei ang ber lantir tura ruahmanna siam nise tih a ni a. Mizo hnam lam hrang hrang leh infiamnate, malzai mawi tak takte bakah Chapchar Kût pual live concert-te buatsaih tum a ni a. Hmalaknate thlirletna hun February ni 21, 2023 ah neih leh nise tih a ni bawk.

Chapchar Kût-ah hian Mizo ziarang lang tam thei ang bera inchei turin Chapchar Kût Celebration Committee chuan mipuite a ngen a. Chapchar Kût pual hian hnam ziarang pholang thei Stall siam tura hmalak nise tih a ni a, naupang zingah hnam thuama incheinalh thlan a nih dawn bakah Chapchar Kût Miss leh Mister thlan a ni dawn bawk a ni. Chapchar Kût hlawhtlin zawk nan Sawrkar hnathawk leh mipuite chu a tam thei ang ber Chapchar Kût chhim turin Chapchar Kût Organizing Committee chuan a sawm a ni.

Meeting-ah hian Sawrkar official-te, NGO hrang hrang hruaitute leh khawtlang hruaitute an tel a ni.