Naupangte pual hapta hmanna kalzelah vawiin khan District Child Protection Unit leh District Legal Services Authority, Champhaite tangkawp buatsaihin Rohmingliana Recreation Centre/Children’s Park, Kahrawt-ah Children Carnival, Champhaia a hmasa ber tur chu buatsaih a ni a. Children Carnival hawnna hunah hian Pu Rex Zarzoliana Vanchhawng, Superintendent of Police Champhai chu khuallian niin Children Carnival hi a hawng a. Pi Lalrochami Ralte, Chief Judicial Magistrate chu khualzahawm niin, Champhai Bawrhsap Pu S.L Naveen, IAS chu  Carnival  Pa, Father of  Carnival a ni.

Khuallian Pu Rex Zarzoliana Vanchawng chuan Children Carnival hmang tura kalkhawm naupangte chu hlim fo thin tur leh thuawihna nunpui thin turin a chah a. Nakin lawka ram leh hnam innghahna tur mipuitling tak tak ni thei tur chuan taima taka lehkha zir a tul a ni tiin, naupangte chu zirna  ngaipawimawh hmasa fo turin a chah  a ni. 

Carnival Pa Champhai Bawrhsap Pu S.L Naveen pawhin thusawiin, naupangte hmakhua ngaia an tana ennawm leh infiamna hun buatsaih ani chu lawmawm a tih thu sawiin,  he hun hmang tura kalkhawm naupangte chu an puala hun tha siam chu  hlim leh nuam ti taka hmang turin duhsakna a hlan  a ni.

Vawiin Children Carnival hi naupangte laka hleihlenna hrang hrang thleng thinte ven anih theihna tur tinzawna buatsaih niin, kum 2000 atang khan he ni hi hman tan a ni a. Naupangte’n an naupan lai nunte hleihlenna tellova hlim taka an hman hi an dikna leh chanvo ani tih lantirna tura he Carnival hi buatsaih a ni a. Children Carnival-ah hian naupangte tan infiamna leh ennawm hrang hrangte chhawpchhuah a ni a, an hlimpuiin an hlawkpui hle a ni. 

Children Carnival hawnna hun hi Pu V.L Chama Hnamte, Chairman, Child Welfare Committee (CWC) chuan a kaihruai a. He hunah official leh naupangte enkawl leh venhim kawnga thawktute an tel a ni.  Naupangte pual hapta hmanna kalzelah November Ni 21, 2019 (Ningani) hian I&PR Auditorium, CHANEM Building-ah ngaihsak leh duat bik ngai naupangte pualin hun hman a ni bawk ang.