2269/2023-2024

Champhai the 11th October, 2023 – Vawiin chawhma dar 10:30 khan Education Training Hall, Champhaiah Mizoram Science, Technology & Innovative Council (MISTIC) hnuaia Climate Change Wing bultumin, Science, Social Science leh Environmental Studies Zirtirtute pualin Capacity Building on Climate Change buatsaih a ni a. Pu C.Lalbiakzauva, DEO & DPC Samagra Shiksha, Champhai chuan khuallian niin a hmanpui a ni.

Pu C.Lalbiakzauva, DEO chuan, Climate Change-in nitina kan khawsak phung leh thlawhhma kawng zawh thlengin min nghawng a. Environment tha zawk chhuan thar lo awm turte tana siam turin Zirtirtuten kan zirlaite uar zawka kan hrilh hriat a, kan kaihhruai a tul thu a sawi a.

He inzirtirna hi, Dr. Davy Lalruatliana, Senior Scientific Officer, Mizoram Science Technology & Innovation Council (MISTIC) chuan kaihruaiin, inhmel hriattirna leh sawihawnna neiin kalkhawm chhan a sawifiah a.

Pu Lalthanpuia, Project Scientist, chuan Climate Change awmzia leh chumiin nghawng a neih hrang hrang te power presentation hmangin kalkhawm te hnenah zirtirna a pe a. Champhai District chu zir bing a nih thu sawiin, harsatna hrang hrang a tawh mek leh a dinhmunte a tarlang a. Climate Change chungchang sawihona hun hman a ni bawk.

He hunah hian Champhai khawpui chhunga Primary School – College-a Zirtirtu atangin mi 104 an tel thei a. Pi Lalhruaitluangi, SDEO Champhai chuan lawmthu sawiin he hun hi khar a ni.