583/2024-2025

Champhai, the 28th May, 2024: General Election to Lok Sabha, 2024 a vote tlate chhiar tura Champhai District-a inpuahchahna kalpui mek zelah vawiin chawhnu dar 2:30 khan District Election Office, Champhai buatsaihin DC Conference Hall-ah vote chhiar kalpui dan endik tura ruat Counting Micro-Observer-te tan training thawhkhatna buatsaih a ni.

He hun hmanpuitu Assistant Returning Officer (ARO) Pu James Lalrinchhana, District Election Officer ni bawk chuan election hnuaia hmalakna hrang hrangte ngaihpawimawh vek a nih thu leh enliam mai mai a theih loh thu a sawi a. Vote chhiar turin Champhai District a inpuahchah chhoh mek zel thu sawiin, hemi atana pawimawh tak Counting Micro-Observer-te tana training buatsaih a ni chu lawmawm a tih thu a sawi a. Inthlan buaipui kawngah inzirthar ve zel a tul thu sawiin, Counting Micro-Observer tura ruatte chu mawhphurhnate tha taka hlen chhuah tum turin a fuih a. Inrintawkna nena vote chhiar an hmachhawn theih nan zirtirnate tha taka ngaithla a, taksa leh rilru lam hriselna thlenga dah pawimawh turin a chah nghal bawk.

Vawiin Micro-Observer training buatsaih hi Pu Benjamin Zalawma Ralte, Election Officer chuan kaihruaiin Pu Lalrinawma, PD, DRDO & Additional ARO, 25-East Tuipui Assembly Segment leh Pu K. Zorammuana, Addl. DC & Additional ARO, 23-Champhai North Assembly Segment-te hnen atangin vote chhiar inbuatsaihna leh hemi chungchanga hriattur pawimawhte ngaihthlak a ni a. Pi Lalhruaitluangi, SO, State Level Master Trainer (SLMT) in Counting Micro-Observer-te tihtur leh mawhphurhnate a sawifiah bawk.

Hemi hnu hian Pu Moses Lalfakawma Tlau, SDC kaihruaiin Counting Micro-Observer-te tan EVM/VVPAT khawih dan leh vote tla chhiar dan ataka entirna leh inzirtirna neih a ni.

Lok Sabha Inthlanpuia vote tlate hi June ni 4, 2024 hian chhiar a ni dawn a, Champhai District chhunga Assembly Segment 3 a vote tlate chhiar hna kalpui dan endik tur hian ECI chuan Counting Observer atan Pu Mansoor Aslam Chowdhar, SCS (JK), 2001 chu a ruat a, Counting Observer pui tur hian Counting Micro-Observer 32 ruat an ni a, vawiin training bakah hian ruahman dan chuan May ni 31, 2024 chawhnu dar 2:00 ah training thawhhnihna neih a ni ang.