578/2024-2025

Champhai, the 28th May, 2024: General Election to Lok Sabha, 2024 a vote tlate chhiar tura inpuahchahna kalpui mek zelah vawiin chawhma dar 11:00 khan District Election Office, Champhai buatsaihin DC Conference Hall-ah vote chhiar tura ruat Counting Supervisor leh Counting Assistant-te pualin training thawhkhatna buatsaih a ni.

Pu James Lalrinchhana, ARO & District Election Officer chuan Lok Sabha Inthlanpuia vote tlate chu June ni 4, 2024 ah chhiar a nih dawn thu leh vote chhiar chu inthlan hmawrbawkna, democracy peng pawimawh tak a nih thu a sawi a. Vote chhiar tura ruat Counting Supervisor leh Counting Assistant-te chu mi rintlak leh tha tak tak thlan chhuahte an nih avangin an chungah rinna nghah tlat a ni, a ti a. Tawnhriat ngah tak tak, tun mai nilo inthlan lo hmachhawn fo tawh pawh nise tihsual a awm loh nan training tha tak nei turin a fuih a. Inrintawkna neia mawhphurhnate tha taka hlen chhuah theuh tum turin a chah nghal bawk.

He hun hi Pu Benjamin Zalawma Ralte, Election Officer chuan kaihruaiin Pu Lalrinawma, PD, DRDO & Additional ARO, 25-East Tuipui Assembly Segment leh Pu K. Zorammuana, Addl. DC & Additional ARO, 23-Champhai North Assembly Segment-te hnen atangin vote chhiar inbuatsaihna leh hemi chungchanga hriattur pawimawhte ngaihthlak a ni a. Pi Lalhruaitluangi, SO/BDO Champhai, State Level Master Trainer (SLMT) in Counting Supervisor leh Counting Assistant-te tihtur leh mawhphurhnate a sawifiah bawk.

Hemi hnu hian Counting Supervisor leh Counting Assistant-te hi EVM/VVPAT khawih dan leh vote tlate chhiar dan ataka entirna leh inzirtirna Pu Moses Lalfakawma Tlau, SDC in a neihpui bawk.