3676/2022-2023
Champhai, the 24th February, 2023: Vawiin chawhnu dar 1:30 khan District & Sessions Judge, Champhai Judicial District Pu Liansangzuala, Chairman, Crime Review Commitee & Under Trial Review Commitee, Champhai Judicial District kaihhruaiin a Office Chamber-ah Champhai Judicial District huamchhunga case hrang hrangte chak zawka chinfel a nih theih nana hmalak tulte leh, thubuai ngaihtuah mek under trial chungchangte ngaihtuahin inrawnkhawmna neih a ni.

He hun kaihruaitu District & Sessions Judge Pu Liansangzuala chuan Crime Review Meeting chu Guwahati High Court-in a ngaih pawimawh thu leh Under Trial Review Commitee chu Supreme Court order anga legal services hnuaia tih tura siam a nih thu a sawi a. Dan awmsa tha tak takte a taka hmangin pawikhawihna thleng turte engemawchenah dan theih a nih thu sawiin, dan leh hraite chiang zawka kan hmelhriat leh chhawr tangkai hi a tul takzet a ni, a ti a. Thawktu indaihlohna kara Champhai Judicial District chhungah theihtawp chhuaha hmalak a ni chu fakawm a tih thu a sawi a. Dan lova thil tih do leh pawikhawihtute dan hnuaia hrem an nih theih nana hmalak tlan dan tur duan leh, thuneitu sang zawk hnena a tul angte thlen a pawimawh thute pawh a tarlang a. An chungthu ngaihtuah mek Lungin-a khungte enkawl dan leh hmakhua thlenga ngaihtuahpui a pawimawh thu a sawi a. Inrawnkhawmna chuan Champhai Judicial District ah thawhhona tha zawk a thlen ngei a beisei thu a sawi bawk.
Pi Sylvie Zomuanpuii Ralte, Addl. District & Sessions Judge-in kalkhawmte lawmna thu a sawi a. Mizoramah Judicial District pathum Aizawl, Lunglei leh Champhai te a awm mek thu a sawi a. Case a tam avangin High Court-in Champhai Judicial District ngaipawimawhin case-te chak zawka chinfel a nih theih nan POCSO Fast Track Court pawh a dah thu a sawi a. District thuneitu leh Line Department hrang hrangte nen dan hnuaiah chak taka hmalak a nih theih nana tanho thiam a pawimawh thu sawiin, kalkhawmte chu dan bawhchhiatna thleng thinte dan ang taka doa hremna pek kawnga tanrual puiah a sawm a ni.

District Magistrate Champhai Pu James Lalrinchhana chuan Crime Review Meeting leh Under Trial Review Commitee thutkhawm buatsaih chu District pahnih tana bung thar kaina a nih thu a sawi a. Judiciary leh Executive system-te tanho thiam a pawimawh thu sawiin, heng zinga pakhat a chak loh chuan a khingbai dawn a ni, a ti a. Kan tanrualna avangin hmasawnna leh mipuite ralmuanna a awm thei dawn a ni, a ti a. District & Sessions Judge leh Addl. District & Sessions Judge-te thahnemngaihna zara inrawnkhawmna leh tul dangte sawihona buatsaih chuan rah tha a chhuah ngei a beisei thu a sawi bawk.

He hunah hian Champhai Judicial District hnuaia Excise & Narcotics leh Mizoram Police thawktu neih dan tlangpuite ngaihthlak a ni a. District Jail dinhmun tlangpui bakah District Court Champhai dinhmun tlangpuite ngaihthlak a ni bawk.

Thutkhawmah hian Champhai Judicial District huamchhung chu India ram chhunga ruihhlo tawlhluhna kawng langsar tak a nih mek thu leh ruihhlo tawlh thahnem tak man a nih thin thu tarlan a ni a. Ruihhlo do kawnga India ram pum venhim kawnga daido leh ralveng hmasatu a nih avanga tha tih chak a pawimawh thu tarlan niin, Champhai Judicial District hnuaia thawktu indaihlohna awmte a tul anga hnawhkhah a nih theih dan turte, Excise Out Post neih dan turte leh thil tisualtu hmeichhia an awm changa buaipui thei tur force lamah thawktu hmeichhia, mamawh belh a nih dante thuneitu sang zawkah thlen nise, an ti a. Directorate of Prosecution siam a tul thu pawh thlen tha an ti a. Khawzawlah Chief Judicial Magistrate (CJM) thutchilh Court din tura hmalakna kalpui mek a nih thu tarlan a ni bawk.

Dan lova sumdawnna, ruihhlo tawlhruk leh manah pawikhawihtute chunga dan hnuaia hremna lek kawh a nih theih nan seizure memo leh expert opinion siam zel a pawimawh thu leh, tihral dawnin dilna siama Court order hmuh fel hnua hmalak a him thu tarlan a ni a. Trial kal lai mekte tihral dan turte pawh sawiho niin, hmalak dan turte sawiho leh nise tih a ni a. Thuneitute atanga dan leh thupek chhuah palzuttu leh dan lova thilti man ten dan hnuaia hremna an phu tawk an hmuh ngei theih nana a tira bawhzui tul awmte leh thiam an chan loh nana hmalak tul pawimawhte sawiho a ni a. Rukruk tam lutuk laka hnalak tulte pawh sawiho niin, rukru mai bakah thil ruk leitu thlenga hremna pek an nih zel theih nana hmalak tulte sawiho a ni a.

Jail tawt lutuk tih ziaawm a nih theih nana hmalak theih dan awmte sawiho niin, inrawnkhawmna zau taka neih a ni a. Jail tawt dan ngaihtuah chung zel leh, tangte case neih dante thlir chungin an chungchang ngaihtuah chian leh tulte tarlana sawiho niin, case neih dante zirchian a ni bawk a. Heng bakah hian Medical Examination, Consumer Rights venhim chungchang, Foreigners Act, CWC, JJB leh hmalak ngaihna tul dangte sawiho a ni bawk a. He huna tarlan a nih dan chuan tun dinhmunah District Jail-ah an chungthu ngaihtuah mek Under Trial Prisoner (UTP) mipa 100 leh hmeichhia 13, an vaiin mi 113 an awm mek a. An chungthu ngaihtuah fel tawh mipa 21 leh hmeichhia 2, an vaiin mi 23 te an awm mek a ni.

He hunah hian Pu Lalvenhima, Addl. District Magistrate, Khawzawl; Pu Lalrinpuia Varte, SP Champhai; Pu Lalchhuanthanga, SP Khawzawl; Pu V.Vanlalhriata, Secretary, DLSA-cum-CJM Champhaite bakah, Judicial Magistrate First Class Champhai; Champhai leh Khawzawl Medical Superintendent-te; DIPRO Champhai; Asst. Commissioner of Excise & Narcotics Champhai; Superintendent of District Jail Champhai leh Public Prosecutor, District Court Champhaite an tel a ni.