905/2025-2026

Champhai, dated 24th June 2025: Ram inthlanna hrang hrangah vohbikte'n an dikna leh chanvo an hmuh theihna tur te, veivahna leh chet velna chungchangah vohbikte huap zo ruahmanna a awm theih nan tea hma latu, District Monitoring Committee on Accessible Election (DMCAE) Committee, Champhai District chu vawiin khan District Election Officer (DEO) Pu Mohammad Aaquib hovin DC Conference Hall-ah an ṭhu khawm.

He ṭhutkhawmah hian sawrkar official-te leh tlawmngai pawl aiawhte an tel a. DMCAE Member Secretary, Election Officer Pu Ngulzathuama chuan DMCAE tih tur leh mawhphurhna tar langin, thu ngaihtuah tur a sawi zau a. Vohbikte tana hma lak tawhna te leh hmalakna tur hrang hrangte sawi ho zui a ni.

District Election Office lamin an chhinchhiah danin, Champhai District chhunga assembly bial pathumah vohbik (persons with disabilities) electoral roll-a inziak lut leh chhinchhiah 290 an awm a. Chutih rualin PwD certificate nei an tlem lutuk chu DEO Pu Mohammad Aaquib chuan a ngaimawh thu a sawi a.

District Social welfare Officer, Champhai leh ALIMCO, ZMC, Aizawl te tang dunin PwD te hnenah an mamawh hmanraw hrang hrangte pe turin ruahmanna an kalpui mek a, hemi rual hian PwD te chanvo leh dikna chungchangah awareness/special camp District Election Office nen tangrual a neih nghal tura rel a ni.

PwD ten electoral roll a inchhinchhiahna atana BLO leh Anganwadi enkawltute mawhphurhna te bakah awlsam taka vote an thlak theihna atana hmalak dan tur leh PwD certificate an neih theihna atan special camp neih dan turte sawi ho a ni.