2063/2025-2026

Champhai, dated 4th November 2025: Vawiin khan DC Conference Hall, Keifangtlangah sawrkar hotu leh pawl hrang hrang inhmu khawmin raltlan buaipui dan tur leh tanpui dan tur an sawiho a, Champhai Bawrhsap Pu Mohammad Aaquib chuan he hun hi a kaihruai.

He hunah hian ADRA (Adventist Development and Relief Agency) India Project Manager Pu Sujan Chandra Das chuan ADRA hmalakna leh thil tih te PowerPoint presentation hmangin a tarlang a, Doctors without Borders atangin ramriah leh tulna hmun hrang hrangah raltlan an enkawl dan chungchang ngaihthlak a ni bawk. Pawl hrang hrang - ZEP (Zoram Entu Pawl), HI (Humanity and Inclusion) leh JRS (Jesuit Refugee Service) te hnathawh ngaihthlak a ni bawk a, anni hian tanpuina chi hrang hrang - eitur te, zirtirna te, health camp te an pe thin a ni. Hemi zawh hian heng pawl hrang hrang te, sawrkar hotute, VC te leh tlawmngai pawl hrang hrang (YMA, MHIP etc.) tha taka an thawhho theih dan tur te, raltlan tam zawk an enkawl theih dan tur te, biometric authentication chungchang te sawiho a ni. Chairman Pu Mohammad Aaquib chuan pawl hrang hrang hnathawh that avangin lawmthu a sawi a, thawk tha chhunzawm zel turin duhsakna a hlan a, thawhpui turin sawrkar a inhuam reng a ni tih sawiin department leh pawl dangte inhawng turin a fuih bawk a ni.

Champhai District-ah hian Myanmar atanga raltlan November ni 4 thlenga hriat theih chinah:

Male - 4256
Female - 4328
18 yrs below - 5078
Total - 13662