No.3839/2020-2021

Dated Champhai, the 6th August, 2020 (Thursday): Tun thla August Ni 27, 2020 a Village Council inthlanna neih tura ruat, dik leh felfai taka kalpui anih thei dan turte thlirin vawiin khan Champhai DC Conference Hall-ah District Election Officer Pi Maria C.T Zuali hovin meeting neih a ni.

Pi Maria C.T Zuali chuan Village Council inthlanna neih tur chu State Election Commission kaihhruaina hnuaia neih tur anih thu sawiin, nimin lawka inthlan hun puan anih atangin Model Code of Conduct hman nghal a ni, a ti a. Champhai district chhungah Village Council 62 a awm thu leh Polling Station 71 siam anih dawn thu a sawi a. Senso tlem leh hautak lo thei ang bera inthlanna kalpui a tul thu sawiin, inthlanna felfai leh dik tak neih anih theihna tur chuan kan zavaia tan tlana intawiawm tawn angai a ni, a ti a. Inthlanna felfai leh dik neih anih theihna kawnga Mizoram People Forum hmalakna chu fakawm a tih thu sawiin, Sector hrang hrangte vil turin Sectoral Magistrate 6 te ruat an nih thu leh Nodal Officer hrang hrangte pawh ruat an nih thu a sawi a. Inthlanna felfai, awn lam bik neilo leh entawntlak tak neih anih theihna turin Sectoral Magistrate-te mahni bial theuh ngun taka vil tur leh Returning Officer, Polling Officer-te leh chanvo pek hrang hrangte dik taka mahni mawhphurhnate hlen chhuah tum theuh turin a chah a ni.

Pu Rex Zarzoliana Vanchhawng, SP Champhai hnen atangin inthlanna neih tura venhimna kalpui dan tur chungchanga ruahmanna neihte ngaihthlak a ni a. Pu Lalnunfela Chawngthu, Addl. District Election Officer chuan Model Code of Conduct chungchang a sawifiah a, Champhai District chhungah VC Seat 282 a awm a, heng zinga 208 hi General seat niin, 74 dangte chu hmeichhiate tana hauh reserved seat a ni a, a ti a. Polling Station 71 ah Voting Compartment 104 siam tum anih thu leh district pumpui tan General Observer 1 ruat anih dawn thu a sawi a. Covid-19 hripui vanga inkaihhruaina siamte ngaipawimawh chunga inthlanna kalpui tum anih thu pawh sawiin, inthlan campaign punkhawm leh vote thlak ni a social distancing kenkawh chungchangah pawh hmalak tum anih thu a sawi bawk.

Champhai District Mizoram People Forum (MPF) chuan inthlanna felfai leh muanawm tak neih anih theihna turin Local Forum theuhte nena tangkawpin District Election Official-te an tawiawm dawn thu an tarlang bawk a. He hunah hian inthlanna neih tur kawnga hmabak awm hrang hrangte sawiho niin, vote thlak huna chettlatna hmun tur Polling Station hrang hrangte dinhmun thehluh zirchian a ni a. Inkalpawhna, inbiakpawhna, eng, tui leh mamawh awm thei dangte dah anih theihna turin line department hrang hrangte chanvo siam a ni a. Political party leh NGO aiawhte hnen atangin zawhna an neihte ngaihthlak niin, a chinfel dan tur leh hmalak dan turte sawiho nghal a ni.

Vawiin meeting-ah hian Pi Maria C.T Zuali DEO, Pu Rex Zarzoliana Vanchhawng SP, Pu Mark Lalthanliana ERO, Pu Lalnunfela Chawngthu Addl. DEO, ERO, AERO, Sectoral Magistrate, Nodal Officer, NGO aiawh, MPF hotute leh political party aiawh theute an tel a ni.