Vawiin chawhma khan  DC’s Conference Hall Keifangtlang, Champhaiah District Consultative Committee (DCC) & District Level Committee (DLRC) chu Chairman Champhai DC charge la mektu Pi Lalsangpuii Hmar, Addl DC kaihhruaina hnuaiah neih a ni. He Meeting-ah hian Pu SP Sarmah, Chief Manager, SBI Lead Bank Office Champhai chuan kalkhawmte lawmna thu a sawi a. He hunah hian nikum September-December, 2017 Quarter chhunga hnathawhte thlirletna leh hmalak zel dan turte sawiho a ni.

Pi Lalsangpuii Hmar chuan Bank hnathawktute chu mipuite tana rawngbawltu an nih hre reng tura chahin Bank hman dan leh digital payment scheme hnuaia mipui tam zawk an inziahluh theih nan tan lak a ngaih thu a sawi a. Last quarter chhunga target-te khum anih hman ngei theih nana theihtawp chhuah turin Banker leh line department hotute chu a chah nghal a ni.

He hunah hian Pu Ankit Aggarwal, Manger & LBO, RBI Sub-Office, Aizawl pawhin thu sawiin Champhai District chu Banking lamah District titha ber pawl an nih thu a sawi a. Bank-te chu cheng sawm thir pawma thleng sak thin turin a chah a. Thingtlangmite tan Bank hman dan leh hamthatnate nasa zawka zirtir turin Bank hnathawktute chu a chah a ni.

Meeting chuan December ni 31,2017 thlenga Champhai District a Bank hrang hrangte Credit Deposit (CD) ratio khaikhawm chu za zela 56.63 a nih thu  tarlangin hei hian CD Ratio bituk za zela  60 chu a phak lo  a ni. Hemi bakah hian Priority Sector tana loan pekchhuah chu za zela 68.32 niin hei hian bituk za zela 40 chu a khum a ni. Agricultural Segment hnuaia loan pekchhuah zat chu za zela 19.88 a ni a, hei hian bituk zat za zela 18 chu a khum a ni. Thingtlang/Zokhaw mite tana bank hman dan zirtirna, Digital Financial Literacy Awareness Programme tum 66 neih niin hemi hmang hian mi 61,07 te chu zirtirna pek an ni a. Third quarter tawp December thlenga ACP achievement chu za zela 41, Education Loan 1 pekchhuah niin Housing loan 65 pekchhuah a ni a. Pradhan Mantri Mudra Yojana (PMMY) hnuaiah loan mi 533 hnenah cheng nuai 707.61 hu pekchhuah a ni a. Stand up India Scheme kaltlangin mi 29 te hnenah tanpuina loan cheng nuai 378.88 pek chhuah a ni tawh bawk a ni. Social Security Scheme hnuaiah  Bank kaltlanga  cashless transaction  siam niin Pradhan Mantri Suraksha Bima Yojana (PMSBY) hnuaiah mi 6,677; Pradhan Mantri Jeevan Jyoti Bima Yojana (PMJJBY) hnuaiah mi 3,553 leh Atal Pension Yojana (APY) hnuaiah mi 57-te  an inziaklut tawh a ni. Heng bakah hian Bank Security chungchangte pawh sawiho a ni.

Tun dinhmunah Champhai District-ah Bank hrang hrang branch 22 a awm mek a, hei hi mi 5,715 in Branch 1 intawm ang vel a ni (Mizoram pumah chuan mi 5,486 in Branch 1 intawm ang an ni). Hemi bakah hian ATM 10 a awm bawk a ni. Axis Bank, Champhai Branch chu tun atanga reilotea hawn tum a ni bawk.

Meeting chuan thingtlang leh hmun kilkhawr zawka awmte tana awlsam zawk nan Banking outlet panga heng; Melbuk, Kelkang, N.Khawbung, Ngur leh Vapar khuaah te hian kar khata vawi 2/3 vel hawn thin anih theih dan tur pawh a rel a. Teikhang leh Farkawn khuate'n Bank Branch  thar hawn an dilna pawh MRB hotute hnena a tul ang bawhzui tura thlen nise a ti bawk a ni. Adhaar Enrollment Centre, Champhaia neih dan tur pawh ngaihtuahho a ni.

Meeting-ah hian line department hrang hrang aiawhte, AMFU aiawh leh Champhai District huam chhunga Bank hrang hrang hnuaia Branch Manager-te leh thawktute an tel  a ni.