1286/2026-2027

Dated Champhai, 3rd July 2026: Champhai District Cooperative Development Committee (DCDC) chu Champhai Bawrhsap leh an Chairman ni bawk Pu Mohammad Aaquib hovin DC Conference Hall, Keifangtlangah an thukhawm.

He thutkhawmah hian Pu B. Lalchhanhima, District Cooperative Officer leh Member Secretary ni bawk chuan report pein, Champhai District a hmalakna hrang hrang thlirletna neih a ni a. Champhai District chhungah hian tun dinhmunah cooperative society hrang hrang 180 an in register mek a, society nung lo pathum—Zokhawthar Multipurpose, Khuangleng Multipurpose, leh Champhai Vengthar Pig Producer Cooperative Society Ltd. te chu tihnun thar leh an niin dan anga hnathawk zui lo society pariat (8) zet chu tih tawp an ni.

Sorkar thuchhuak angin hmun hrang hranga dan lova hralh thin tih rem a nih theih nan cooperative society-te hnenah petroleum license pek niin, uluk taka endik an ni a, Pradhan Mantri Kisan Samriddhi Kendra (PMKSK) hnuaiah lo neituten hlawk zawka leitha an lei theihna turin Champhai LAMB PACS Ltd leh Vaphai MPACS Ltd te hnenah license pek an ni a. PMBJK (Jan Aushadhi Kendra) hmanga mipui hnena damdawi tlawm leh tha pek chhuah a nih theihnan ruahhmanna kalpui mek a ni bawk.

Ministry of Cooperation hmalakna hnuaiah PACS te chu hmasawnna mil zela thlak danglam niin computerization kalpui mek a ni a, Champhai district-a PACS 5 te chu hlawhtling taka e-PACS (electronic) kalpui tawh niin, a thawhhnihna atan Kelkang M-PACS Ltd leh Zotlang M-PACS Ltd. te hmanrua (hardware) te pawh pek an ni tawh a ni. A thawh thumna atan society pasarih (7) thlan chhuah tawh niin, kumin chhung hian peih fel hman beisei a ni bawk.

Ministry of Cooperation '5th Foundation Day' leh 'Cooperative Week, 2026' pualin Champhai District chhung hmun hrang hranga thingphun hnatlang neih a ni a, khaw hrang hrang—Mualkawi, Zotlang, leh Ngur-ah te inzirtirna (Gram Sabha-cum-Awareness Programmes) neih tur ruahhmanna kalpui mek a ni bawk.