3274/2022-2023
Champhai, the 17th January, 2023: District chhunga mihring piang leh thite dan hnuaia felfai taka chhinchhiah leh certificate dik leh felfai tak pekchhuah anih theihna tura hmala tura Sawrkarin a din, District Level Coordination Committee (DLCC) under Civil Registration System of Births & Deaths chu an Chairman, District Bawrhsap Pu James Lalrinchhana, District Registrar of Births & Deaths ni bawk hovin vawiin chawhma dar 11 khan DC Conference Hall-ah an thukhawm.

District Registrar of Births & Deaths Pu James Lalrinchhana, District Bawrhsap chuan District Level Committee under Civil Registration of Births & Deaths chu District chhunga mihring piang leh thite mumal taka chhinchhiah leh lehkha pawimawh pek chhuah kawnga hma la tura Sawrkarin mumal taka a din anih thu sawiin, committee hnuaiah mawhphurhna nei line department hrang hrangte telh an ni a, thuneihna sang tak nei leh khua leh tuite hmakhua ngaia ngaihtuahna seng tura din committee pawimawh tak anih thu a sawi a. Kum khata vawihnih tal thukhawm tura tih anih thu pawh sawiin, kalzelna turah ngaihtuahna senga infinchhuah tawn zel a pawimawh thu a sawi bawk.

He hunah hian District Level Committee under Civil Registration of Births & Deaths din anih chhan leh mawhphurhna neihte bakah kalphung hrang hrangte sawiho a ni a. Registration of Births & Deaths (RBD) Act, 1969 hnuaiah khua leh tui piang leh thi zawng zawngte chhinchhiah ngei ngei tur an nih thu leh chhinchhiah ni la lain certificate pek chhuah nghal tur anih thu tarlan a ni a. Certificate siam chawp leh a lem hrang hrangte man chhuah kawngah tanrual a pawimawh thu leh uluk lehzuala ven a pawimawh thu tarlan a ni a. Raltlan leh ram dang atanga dan lova lo lut, piang leh thite dan anga register theih an nih loh thu pawh tarlan niin, District chhunga Registrar of Births & Deaths (RBD) 64 awm mekte pawh dan hnuaiah finfiahna mumal tak neia, fimkhur taka piang leh thite chhinchhiah thlap thlap turin an chah nghal bawk.

Mahni veng/khuaa Registrar of Births & Deaths Sawrkarin a ruatte atangin pian ni atanga ni 21 chhungin a thlawnin Birth leh Death Certificate a lak theih a, ni 21 atanga thla pum thlengin Rs 110/- chawi a ngai a. Thla 1 atanga kum 1 inkarah erawh chuan District Research Office (DRO) ah Rs 220/- chawia dilna thlen a ngai a. Kum 1 a pelh tawh chuan DRO atangin Non Availability Certificate (NAC) la hmasain Executive Magistrate-ah Delayed Birth/Death Certificate dilna thlen a ngai tawh thung a, Rs 1,300/- sen angai a ni.