884/2022-2023
Champhai, the 13th June, 2022: District Level Narco Coordination Centre (NCORD) Committee, Champhai District thutkhawm hmasa ber chu vawiin chawhma dar 11:00 khan an Chairperson Pu James Lalrinchhana, District Magistrate hovin DC Conference Hall-ah neih a ni.

Pu James Lalrinchhana chuan nitin deuh thaw maia damdawi leh ruihhlo dang man thawm hriat tur a awm fo chu a vei thu a sawi a. Ruihhlo leh a kaihhnawih hrang hrangte laka fihlim tur leh beihlet kawngah tanrual a ngaih takzet thu sawiin, member kalkhawmte chu ngaihtuahna fim tak hmanga hmalak ho dan tur thawh theuh turin a sawm a. International boundary bula awm District kan nih avangin tanlak nasat zual a ngai a, kan hmalaknate mipuiten an ngaichang reng a, kan inthlahdah thianglo a ni, a ti. Thutkhawm vawikhatna chu a bultanna a nih angin thawhhona tha tak hnuaiah hmasawn a beisei thu a sawi a. Ram leh hnam zawi muanga tichhe mek zeltu ruihhlo leh a kaihhnawihte theihtawp chhuaha kan do tlan a ngai a ni, a ti bawk.

Member Convener Pu Lalrinpuia Varte, SP Champhai chuan kalkhawmte lawmna thu sawiin, NCORD chu District tana thil thar tun hnai maia sawkarin a din a ni, a ti a. Kum 10 kalta chhunga damdawi tawlh man leh hmalaknate tarlangin, Champhai District Police-in kum 2018 ah heroin kg 4 leh gram 300 (4.300 kg) an man laiin kum 2022 kum chanve chhung chauhin heroin kg 6 chuang an man tlin tawh thu a sawi a. Drug supply tam ta lutuk chu ngun taka ngaihvena tha thlah lova hmalak a tul a ni, a ti bawk.

He hunah hian District Level Narco Coordination Centre (NCORD) Committee kalphung leh a thukente ngaihtuahho a ni a. Tihbelh tul ni a hriatte sawiho a siam rem a ni a. Line Department hrang hrang kaltlanga khawtlang huap, kohhran leh zirna ina drugs awareness campaign neih tawh dan hrang hrangte ngaihthlak niin, tun aia nasa lehzuala ruihhlo laka fihlim tura inzirtirna awareness campaign neih tha tih a ni a. Zirlai, thalai, nu leh pa leh rual u zawkte thlenga inzirtirna huapzo neih ni se tih a ni. YMA branch, zirna in leh kohhranahte a bika inzirtirna hun siam tur leh thawhhopui tura ngenna siam tha tih niin, thalaite ruihhlo laka an fihlim theihna tura hmalakna Nasha Mukh Bharat Abhiyan nen a tandun tha tih a ni a. Ruihhlo tawlh tihtlem leh a kaihhnawiha manten an phu tawk hremna an hmuh theih nana tanlak tulnate sawiho a ni bawk a. Damdawi leh ruihhlo dang hluarna veng leh khuaahte hmalak hmasak tha tih niin, hmalak bultan ngaihnate sawiho a ni bawk.

He hunah hian NCORD awmzia leh nihphungte bakah kumin chhunga Champhai District Police, Excise & Narcotics Department Champhai leh Custom Preventive Force, Champhaite hmalakna kaltlanga ruihhlo man, ND&PS Act hnuaia case ziahluh dan tlangpui Addl. SP Pu C.Lalengliana hnen atangin ngaihthlak a ni a. Tarlan a nih dan chuan kum 2022 kum bul atanga vawiin June ni 13, 2022 thlengin ND&PS Act hnuaiah case 78 ziahluh a ni a, mi 88 man niin heng zinga 11 te hi ram dang mi te an ni. Heroin gram 12,260.500 man niin, tualchhung market-a a hlut zawng cheng nuai 282.90 leh international market-a a hlut zawng cheng nuai 6130.25 a ni a. Meth mum 90,000, a hlut zawng cheng nuai 180 bakah hian Ganja kg 534.500, cheng nuai 16.03 hu man a ni bawk.

Meeting-a tarlan a nih danin ND&PS Act hnuaiah kumin June ni 13 thlengin Champhai District Police-te heroin gram 6,381 leh meth mum 10,000 manin case 34 an ziaklut a, hemi kaihhnawihah hian mi 39 manin an zinga 8 hi ram dang mi an ni. Hemi dan hnuaiah vek hian Excise & Narcotic Department Champhaite chuan vawiin June ni 13 thleng hian heroin gram 5128.300, meth mum 80,000 leh ganja kg 534.500 manin case 43 an ziaklut a, hemi kaihhnawihah hian mi 48 an man a, 2 te hi ram dang mi an ni. Custom Preventive Force, Champhaite chuan heroin gram 751.200 an man a, hemi kaihhnawihah hian ram dang mi 1 an man a ni.

Champhaiah Drugs De-addiction & Rehabilitation Centre 6 awm mekin, enkawl mipa 284 leh hmeichhia 36, an vaiin mi 320 an awm mek a. NCORD kaltlanga heng enkawlna hmunte hmalak dan thlithlai chungchangte sawiho a ni a. Mipuite hnena NCORD hnuaia hmalakna khuhhawnna neih tha tih a ni a, he hunah hian ruihhlo leh a kaihhnawih chungchang inzirtirna agency dang dangte nena tangkawpin buatsaih ni se tih a ni bawk.